Текелі қаласында «Саналы ұрпақ» пен «Бақытты әрі қауіпсіз балалық шақ» жобалары аясында профилактикалық іс-шара ұйымдастырылды. Мақсат – өскелең ұрпақтың құқықтық сауаттылығын арттырып, отбасылық құндылықтарды нығайту және балалар қауіпсіздігін қамтамасыз ету, – деп хабарлайды 7-su.kz ақпараттық порталы.
«Viking Tekeli» туристік базасында өткен жиынға 14 отбасы мен 30 бала қатысты. Қала прокуратурасы, полиция, төтенше жағдайлар бөлімі және волонтерлер бірлесіп өткізген шарада балалардың спорттық дағдылары мен зияткерлік қабілеттері сынға түсті. Спорттық эстафеталар мен танымдық ойындар жеңімпаздары грамоталар және сыйлықтармен марапатталды.
Іс-шара аясында мамандар балаларға алғашқы медициналық көмек көрсету, таулы аймақтағы қауіпсіздік ережелері мен төтенше жағдай кезіндегі іс-қимылдар жайында тәжірибелік сабақтар өткізді. Құқық қорғау органдарының өкілдері кәмелетке толмағандар арасындағы құқық бұзушылықтың алдын алу, жол ережесін сақтау және салауатты өмір салтын қалыптастыру бойынша түсіндіру жұмыстарын жүргізді.
Мұндай бастамалар мемлекеттік органдар мен тұрғындар арасындағы байланысты жақсартып, қауіпсіз мінез-құлық мәдениетін қалыптастырады. Балалар мен ата-аналардың бірлескен демалысы достық пен бірлікті нығайтуға үлес қосады. Ұйымдастырушылар аталған форматтағы кездесулерді тұрақты негізде жалғастыруды жоспарлайды.
