Жетісу жеріне арнайы іссапармен келген Денсаулық сақтау министрі Ақмарал Әлназарова Талдықорған қалалық көпсалалы ауруханасына барып, дәрігерлермен кездесті. Алдағы уақытта халықтың денсаулығын нығайтуға қажетті жаңа жүйелерді іске қосатынын айтқан министр ауруханалардың, оңалту орталықтарының жұмысын жақсартуға ерекше көңіл бөлінетінін жеткізді.
– Биыл жер-жерде топан судың қаптауына байланысты бюджет қаржысы үнемделді. Алдағы уақытта жалақыларыңызды көтеру жағын ойластырамыз. Міндетті әлеуметтік сақтандыру жүйесінің денсаулықты сақтаудағы рөлін арттырамыз. Біз сіздердің алаңсыз, кедергісіз жұмыс жасауларыңызға барлық жағдайды жасаймыз. Денсаулық сақтау саласын озық аппараттармен қамтамасыз етуге тырысамыз. Сіздер де өз тараптарыңыздан халықтың өмір жасын ұзартуға, денсаулықтарының жақсы болуына күш-қайраттарыңызды жұмсаңыздар, – деген Ақмарал Әлназарова қалалық көпсалалы аурухананың колопроктология бөлімінде ем алып жатқан 97 жастағы Иван Симакиннің денсаулығын білуге барды. Сырқаттың халін сұрап, жеміс толы себет тарту еткен Ақмарал Шәріпбайқызы қарияға: «100 жасаңыз!» деген тілек арнады.
Еңбек ардагері Қуат Әуенов басқаратын бөлімнің дәрігерлері мен медбикелеріне жарқын болашақ үшін сіңірген еңбегіне ризашылық білдіріп, алғыс айтты.
Одан кейін облыстық перинаталдық орталыққа барған министр шала туған нәрестелер жататын бөлімге кіріп, шақалақтардың хал-жайымен танысты. Арнайы құты ішінде жатқан сәбилер өмірге құштарлықтарын тыпырлаған аяқ-қолдарының қимылымен байқатты. 1 келіге дейін салмақтағы шараналарды аман алып қалған дәрігерлердің еңбегіне ризашылық білдірген Әлназарова бөлімдегі жаңашылдықтармен танысып, мәліметтерге назар аударды. Мамандардың айтуынша, биыл 10 айда 4815 бала жарық дүние есігін ашқан перинаталдық орталықта 2 үшем дүниеге келген.
Ақмарал Шәріпбайқызы жаңа босанған әйелдерге бауы берік болсын айтып, әр сәбиге жөргек сыйлады.
Гүлжан Тұрсын
Суретті түсірген Жұмабай Мұсабеков
