Қазақстанда медициналық ұйымдардың қажеттіліктерін нақты жоспарлау мен сатып алу рәсімдерін оңтайландыру нәтижесінде бюджеттің қомақты қаражаты үнемделді, – деп хабарлайды 7-su.kz ақпараттық порталы ҚР Денсаулық сақтау министрлігінің баспасөз қызметіне сілтеме жасап.
2025 жылдың қорытындысы бойынша дәрілік заттарды сатып алу үдерісінде 85 млрд теңгеден астам қаржы үнемделген. Бұл қаражат жыл ішінде емі жаңадан тағайындалған пациенттерге қосымша дәрі-дәрмек сатып алуға бағытталды.
Денсаулық сақтау саласындағы маңызды жетістіктер:
-
Төмендетілмейтін қор: «СҚ-Фармация» тарихында алғаш рет 21 млрд теңге сомасында арнайы қор қалыптастырылды. Бұл қор елдің 2–3 айлық қажеттілігін жабуға және сұраныс кенет артқан жағдайда шұғыл әрекет етуге мүмкіндік береді.
-
Әлеуметтік маңызы бар аурулар: Қабылданған шаралардың арқасында қант диабеті, онкология, гемофилия және ағза трансплантациясы жасалған науқастарды емдеу үздіксіз жүргізілді.
-
Шұғыл көмек: 2025 жылы жаңадан тіркелген 31 трансплантация жасалған пациент үшін қажетті препараттар жедел тәртіпте сатып алынып, жеткізілді.
2026 жылы Бірыңғай дистрибьютор 2 мыңнан астам дәрі-дәрмек пен медициналық бұйым түрін сатып алуды жоспарлап отыр. Ауруханалар мен емханаларға жеткізу жұмыстары қаңтар айының алғашқы күндерінен-ақ басталып кетті. Министрлік бұл бағытта жоспарлаудың ашықтығы мен жеткізілімнің тұрақтылығын қамтамасыз етуге бағытталған жүйелі өзгерістер жалғаса беретінін атап өтті.
