Адам жанына араша түсу – екінің бірінің қолынан келмейтін жауапты міндет. Әсіресе, қиналған сәтте сабыр сақтап, сырқатқа шипа болу үлкен жүрек пен табанды талапты қажет етеді. Осындай мамандығына адал жас дәрігердің бірі – Көксу аудандық орталық ауруханасының жалпы тәжірибелік дәрігері Адай Жұмағалиев.
Дәрігерлер отбасында тәрбиеленіп өскен жас маман бала күнінен медицина саласының қадірін түсініп, адам өмірінің жауапкершілігін сезініп ер жеткен. Бүгінде ол кәсіби біліктілігімен қатар, қарапайымдылығы мен жанашырлығы арқылы тұрғындардың ықыласына бөленіп отыр.
Жуырда Көксу ауданының тұрғыны, 85 жастағы Клара есімді әжей ауыр хәлде ауруханаға жеткізіледі. Дәл осы сәтте кезекші болған Адай науқасқа жедел көмек көрсетіп, қажетті ем шараларын дер кезінде ұйымдастырады. Қарт ананың жағдайы күрделі болғанына қарамастан, жас маман әр тексеруді мұқият жүргізіп, нақты шешім қабылдай білген.
Ең бастысы – дәрігер ем-доммен шектеліп қалмаған. Қарияның жағдайын тұрақты бақылауда ұстап, үйіне медбике жіберіп, қажетті күтімнің толық жасалуына назар аударған. Мұндай қамқорлық ақ халат иесінің кәсіби міндетіне деген адалдығын ғана емес, азаматтық болмысын да аңғартады.
Ризашылық білдірген Садықовтар отбасы жас дәрігердің еңбегіне шынайы алғысын жеткізді. Олардың айтуынша, адам өміріне бейжай қарамайтын осындай мейірімді мамандар халыққа әрдайым қажет.
Шынында, ел алғысына бөлену – үлкен марапат. Өз ісіне ұқыптылықпен қарап, адам жанына шипа сыйлап жүрген жас дәрігерлер барда медицина саласына деген сенім де нығая түспек.
Жетісу-Ақпарат
