Енді қазақстандықтар үшін медициналық тексерістен өту бұрынғыдан да қолжетімді әрі жүйелі болмақ. Жаңғырту жұмыстары аясында медициналық тексерулердің сапасы мен мазмұны айтарлықтай өзгерді, – деп хабарлайды 7-su.kz ақпараттық порталы.
Қазақстанның Денсаулық сақтау министрлігі жоспарлы емдеуге жатқызу алдындағы консультациялық-диагностикалық қызметтерді оңтайландырып, скринингтік бағдарламаларды жаңғыртудан өткізді. Бұл өзгерістер ауруды ерте сатысында анықтап, емдеу тиімділігін арттыруға бағытталған. Скрининг тізіміне липопротеиндер (ЛПТТ), триглицеридтер және гликирленген гемоглобин сияқты маңызды талдаулар енгізілді. Бұл қант диабеті мен жүрек-қан тамырлары ауруларын нақты анықтауға мүмкіндік береді. Сонымен қатар, скринингке қатысушылардың жоғарғы жас шегі 76 жасқа дейін ұзартылды, бұл егде жастағы азаматтардың денсаулығын бақылауда ұстауға септігін тигізеді.
Бюрократияны азайту мақсатында, егер зерттеу нәтижелерінде ешқандай өзгеріс болмаса, скринингті мейіргер деңгейінде аяқтауға рұқсат берілді. Бұл бейінді мамандардың кезегін азайтып, уақытты үнемдейді. Ерекше атап өтетін жайт, МӘМС шеңберінде 50 жастан асқан ерлер үшін екі жылда бір рет брахиоцефалдық тамырлардың ультрадыбыстық скринингі енгізілді. Бұл зерттеу ми қанайналымының ерте бұзылуын, яғни инсульттің алдын алуда шешуші рөл атқарады.
Сонымен қатар, 2025 жылдың қыркүйегінен бастап онкоскринингтің барлық кезеңдері тегін медициналық көмектің кепілдік берілген көлемі (ТМККК) аясында қолжетімді болды. Бағдарлама созылмалы вирустық В және С гепатиттерін анықтау бойынша зерттеулермен кеңейтілді. Денсаулық сақтау министрлігінің мәліметінше, 2026 жылы оңалту және паллиативтік көмек бағыттарын қайта қарау жоспарланған. Дертке шалдыққан азаматтардың өмір сүру сапасын жақсартуға және емнен кейінгі қалпына келтіру жұмыстарын жүйелеуге мүмкіндік береді.
Бұл реформалар тек ауруды емдеуге ғана емес, оның алдын алу мәдениетін қалыптастыруға бағытталған. Уақытылы өткен скрининг – ұзақ әрі сауалды ғұмырдың кепілі.
