Көксу ауданына қарасты Кеңарал ауылында ашылған блокты-модульді ғимараттың жалпы ауданы 108 шаршы метр. Медициналық пункт тәулігіне 15 келушіні қабылдайды. Тұрғындарға алғашқы медициналық-санитарлық көмек көрсету үшін қажетті жабдықтардың барлығы алынған. Қатерлі ісіктің алдын алу үшін скрининг, балаларға жоспарлы екпе, жұқпалы сырқаттанудың алдын алуға арналған вакцина жасалады. Салтанатты шарада аудан әкімі Дәулет Халелов сөз алып, емдеу мекемесінде алғашқы медициналық көмек көрсетуге барлық жағдай жасалғандығын айтты.
– Амбулаторияға күндіз ем қабылдайтын төсек-орын қойдық. Екпе жасау, зертханалық кабинеттерді жасақтадық. Денсаулық сақтау министрі келіп Жамбыл, Ақшатоған ауылдық емханасының жұмысымен танысқан. Сонда блокты-модульді емхананың жылдам, сапалы тұрғызылатынына көңіл аударған. Сондықтан мұндай емхананы болашақта да тұрғызатын боламыз,–деді ол.
Биыл «Ауылдық денсаулық сақтауды жаңғырту» Ұлттық жобасы шеңберінде Көксу ауданында 2 блокты- модульді медициналық пунк ашылды. Бір емхана толық күрделі жөндеуден өтті.
Кеңарал ауылындағы жаңа нысанның құрылысына 49 млн. теңге қаражат жұмсалыпты. Мұнда ыстық су, жылу жүйесі жүргізілген.
Шараға келген ауыл тұрғыны Ырысқан Қоқымбаева: «Дүкеннің қасында кішкентай үй болған. Оны да ұқсатып емхана ретінде пайдаланып отырды. Мына емхана жақсы болды. Жарық, таза, заманауи. Ауылға газ да тартып берді. Үкіметке рахмет», – деді.
Ауыл медицинасын дамыту – халық саулығын нығайту.
Келер жылы Көксу ауданында 4 блокты-модулді медициналық пункт тұрғызылмақшы. Бір ауылда дәрігерлік амбулаторияға күрделі жөндеу жүргізу жоспарлануда.
Айта кетерлік жәйт, соңғы үш жылда Жетісу облысында ірілі-ұсақты 98 медицина мекемесі қолданысқа берілген. Биыл 51, келесі жылы тағы 69 нысан ашу жоспарлануда.
Гүлжан Тұрсын
