Алмалы, Қырыққұдық, Тұрпан және Ақжазық ауылдарында дәрігерлік амбулатория пайдалануға берілді. Бұған дейін аталған ауыл тұрғындары ескі, қызмет көрсетуге қолайсыз ғимараттарда медициналық көмекке жүгініп келген.
Жаңа ғимараттар бір үлгіде салынып, қажетті заманауи медициналық жабдықтармен қамтамасыз етілген. Мұнда күндізгі бөлім, оңалту орталығы, зертхана және алғашқы көмек көрсету сынды қызметтер көрсетіліп, күнделікті ем-шаралар жасалады. Медициналық мекемелерде дәрігер, аға медбике, зертхана мамандары мен фельдшер жұмыс істейді. Сонымен қатар, күндізгі стационарда ем алуға арнайы төсектер қойылып, қолайлы жағдай жасалынған.
Панфилов ауданында өткен жылы 16 елді мекенде жаңа денсаулық сақтау нысандары салына бастаған болатын. Өткен жылдың соңында 4 ауылда медициналық мекеме пайдалануға берілсе, биыл жылдың алғашқы тоқсанында Алтыүй ауылында дәл осындай амбулаторияның лентасы қиылды.
Наурыз мерекесіне орай жаңадан ашылған 4 ауылдағы амбулаторияның әрқайсысының аумағы 448 шаршы метрден. Оларға шамамен бірдей қаржы жұмсалған. Осы төрт ауылдағы медициналық мекеме ғимараттарын «Нұр-Шапағат-Құрылыс» ЖШС салған.
Панфилов ауданындағы Сарыбел және Үшарал ауылдарында дәрігерлік амбулаторияға күрделі жөндеу жұмыстары жүргізілуде. Биылғы жылдың екінші тоқсанына дейін қалған ауылдарда да жаңа медициналық нысандар ел игілігіне берілмек. Алдағы бірер жылда өңірдегі барлық елді мекендердегі медицина мекемелері толықтай жаңа ғимараттармен қамтамасыз етілмек.
Мырзағали НҰРСЕЙІТ
Панфилов ауданы
