Жетісу облысында бүгінге дейін 5 мыңға жуық оқушы қызға HPV-ге қарсы вакцина егілді. Сонымен қатар өңірде жасөспірімдер арасында АИТВ-ның алдын алу, жыныстық қатынасқа ерте түсу салдары, жыныстық жолмен берілетін инфекциялардың таралуы және олардың алдын алу мәселелері бойынша кең көлемде түсіндіру жұмыстары жүргізілуде.
Қазіргі таңда елімізде репродуктивті денсаулық апталығы басталды. Шара 16 мамырға дейін жалғасады. Апталық аясында түрлі ақпараттық кездесулер мен түсіндіру жұмыстары ұйымдастырылуда.
Облыстық денсаулық сақтау басқармасы басшысының орынбасары Жанета Нұрманбетова өңірде жүргізіліп жатқан жобалар туралы ақпарат берді.
– Мемлекет басшысы Қасым-Жомарт Кемелұлы Тоқаев репродуктивті денсаулық мәселесіне ерекше мән беріп келеді. Президенттің бастамасымен қолға алынған «Аңсаған сәби» бағдарламасы – отбасылық институтты нығайтуға бағытталған нақты қадамдардың бірі. Бұл бағдарлама репродуктивті денсаулық саласындағы мемлекеттік саясаттың маңызды құрамдас бөлігіне айналды. Бүгінде бұл тақырыптарды ашық, ғылыми негізде және кәсіби деңгейде талқылау бұрынғыдан да өзекті. Өткен жылғы тәжірибе бұл бастаманың қоғам үшін маңыздылығын көрсетті. Сондықтан репродуктивті денсаулық апталығын жыл сайын өткізу туралы шешім қабылдадық, – деді Жанета Нұрманбетова.
Медет Жұмабай
