Қазақстанда адам папилломасы вирусына (АПВ) қарсы иммундау бағдарламасы жалғасуда. Денсаулық сақтау министрлігінің мәліметінше, бағдарламаның бірінші кезеңі аясында 11-13 жас аралығындағы 149,3 мыңнан астам қыз бала вакцина алды. Сонымен қатар, шамамен 90 мың жасөспірімге вакцинаның екінші дозасы салынды. Жалпы, 2023 жылдың қыркүйегінен бері ел бойынша АПВ-ға қарсы 238,2 мың профилактикалық егу жүргізілген.
Ресми деректерге сәйкес, вакцинациядан кейін жағымсыз реакциялар тіркелмеген. Дүниежүзілік денсаулық сақтау ұйымы (ДДСҰ) АПВ-ға қарсы вакцинаны қауіпсіз әрі тиімді алдын алу шарасы ретінде ұсынады.
АПВ вакцинациясының басты мақсаты — әйелдерді жатыр мойны обырынан, сонымен қатар гениталий кондиломалары, анус пен жыныс мүшелерінің қатерлі ісіктері сияқты басқа да онкологиялық аурулардан қорғау.
Қазіргі таңда әлемнің 147 елі бұл вакцинаны ұлттық иммундау бағдарламаларына енгізсе, 76 мемлекет оны ұлдар мен қыздарға бірдей жүргізуде. Контингенттің кеңеюі вирустың халық арасында таралуын азайтып, АПВ-ға байланысты аурулардың алдын алуға ықпал етеді. Осыған байланысты еліміздің Денсаулық сақтау министрлігі 11 жастағы ұл балаларды да АПВ вакцинациясымен қамту мәселесін қарастырып отыр.
Сонымен бірге, Қорғаныс министрлігінің бастамасымен мерзімді әскери қызметшілерге менингококк инфекциясына қарсы екпе егу жоспарлануда. Себебі бұл топ эпидемиологиялық тұрғыдан ең осал саналады: әскери өмір тығыз байланыс, ұжымдық тұру, жиі іссапарлар мен далалық жаттығулармен байланысты, бұл аурудың тез таралуына жағдай туғызуы мүмкін.
Оған қоса, Ұлттық техникалық консультациялық топтың ұсынымына сәйкес, 1 жасқа дейінгі балалар үшін вакцинация кестесіне өзгерістер енгізу қарастырылып отыр. Ол көкжөтелге, дифтерияға, сіреспеге, В типті гемофильді инфекцияға, полиомиелитке және В гепатитіне қарсы егу мерзімін жаңартуды көздейді.
Сондай-ақ, 16 жастағы жасөспірімдер мен жүкті әйелдерге эпидемиологиялық көрсеткіштер бойынша көкжөтелге қарсы вакцинацияны ерікті түрде енгізу ұсынылуда.
Мамандардың айтуынша, иммундауға жататын контингенттің кеңеюі инфекциялық аурулардың ауыр ағымының, асқынулардың, сондай-ақ өлім-жітімнің алдын алуға сеп болады. Бұл шаралар халық денсаулығын қорғау жолындағы маңызды қадам болып табылады.
