ҚР Денсаулық сақтау бірінші вице-министрі Тимур Сұлтанғазиев Жетісу облысына сапарын Текелі қаласынан бастады.
Сапар ресми ауанда басталғанымен, көп ұзамай шынайы диалог алаңына айналды. Қала тұрғындары министрге тікелей сауалын қойып, мазалап жүрген мәселелерін бүкпесіз жеткізді. Бірі анасы үшін алаңдаса, енді бірі баласының ем-домын уайымдайды. Бұл денсаулықтың жай ғана статистика емес, әрбір отбасының тағдыры екенін тағы бір дәлелдеді.
Қазіргі заманғы медицинаның басты құралы нақты диагностика. Текеліде бұл бағытта біраз олқылық бар екенін халық ашық айтты. Қалада МРТ (магниттік-резонанстық томография) мен УЗИ (ультрадыбыстық зерттеу) аппаратының жоқтығы күрделі ауруларды дер кезінде анықтауға кедергі келтіріп отырғанына шағымданды. Министр бұл мәселені назарға алып, жақын арада қажетті құрал-жабдықтар жеткізілетінін мәлімдеді.
Сапар барысында Тимур Сұлтанғазиев жергілікті БАҚ өкілдерімен де сұхбаттасты. Қоғамдық денсаулық сақтау, профилактикалық медицина және кадр тапшылығын шешу секілді кең ауқымды тақырыптарды қамтыды.
Одан кейін вице-министр тұрғындарды жеке қабылдады. Бұл көптен бері қала тұрғындарының шешілмеген мәселелерін жайып салуға берілген мүмкіндік еді. Біреудің сөзі – жанайқай, біреуінікі –үнсіз үміт. Алдағы уақытта барлық тұрғынға көңіл бөліп, нақты шешімдер шығаруға тырысты.
Тимур Сұлтанғазиев: «Осы жылы жаңа рентген аппараты беріледі. Ал келесі жылы эксперт класстағы ультрадыбыстық зерттеу құралы орнатылады», – деп медициналық сақтандыру
жүйесіне қатысты түсініспеушіліктерден бастап, амбулаториялық қызмет көрсету, дәрілік заттарға қолжетімділік сияқты күнделікті өмірге тікелей әсер ететін түйткілді мәселелерді де шешетінін айтты.
Санжар СҰЛТАНҒАЗЫ
Фото: Дмитрий Ерофеев
