Жетісу облысының орталығындағы Салтанат сарайы ғимаратында өткен басқосуда шаһар басшысы аймақтағы барлық ақ халатты абзал жандарға ақ тілегін арнап, атқарған істері үшін алғыс айтты.
– Бүгінде аймақтағы денсаулық сақтау саласын дамытуға баса мән берілуде. Алдағы уақытта медициналық қызметтің қолжетімділігі мен сапасын арттыру мақсатында бірқатар жаңа нысандар іске қосылады. Атап айтқанда, жақында қалада 200 орындық онкологиялық диспансердің құрылысы басталса, шаһардың Оңтүстік-Батыс шағын аудандағы аяқталмай қалған ғимаратты бір ауысымда 500 адам қабылдай алатын заманауи емхана ретінде қайта жаңғырту жоспарда. Ал таяуда қалаға қарасты Өтенай ауылында заманауи қондырғылармен жабдықталып салынған 100 орындық дәрігерлік амбулатория пайдалануға беріледі. Мұндай қолдаулар бұдан былай да жалғаса беретін болады,– деді Ернат Дұйсенбекұлы.
Осыдан кейін қала әкімі өңірдегі аталған салада қажырлы еңбек етіп жүрген 40-қа жуық үздік маманға арнайы Алғыс хат және Құрмет грамоталарын табыс етті. Жиын соңы өңір өнерпаздарының концерттік бағдарламасына ұласты.
Мамандардың мәліметінше, бүгінде Жетісудың бас қаласы Талдықорғанда 900-ден астам дәрігер, 3 мыңға жуық орта буын медицина қызметкерлері табысты еңбек етіп келеді.
Айдын КӘЛІМХАН
