Елімізде 11-17 мамыр аралығында тұзды шамадан тыс тұтынудың зияны туралы ақпараттандыру апталығы (Salt Awareness Week) өтіп жатыр. Денсаулық сақтау министрлігі ұйымдастырған науқанның басты мақсаты – халықтың тамақтану мәдениетін қалыптастырып, тұздың адам ағзасына тигізетін жағымсыз әсерлері туралы хабардарлықты арттыру, – деп хабарлайды 7-su.kz ақпараттық порталы turkystan.kz сайтына сілтеме жасап.
Тұзды мөлшерден тыс қолдану – артериялық қан қысымының көтерілуіне, жүрек-қан тамырлары аурулары мен инсультке тікелей себепші болатын фактор. Аталған дерттер әлемдік статистика бойынша өлім-жітімнің негізгі себептерінің қатарында. Мамандардың айтуынша, күнделікті рационымыздағы тұздың басым бөлігі біздің асханамыздағы тұз сауыттан емес, өңделген және қаптамадағы дайын өнімдер арқылы ағзаға түседі. Сондықтан тек жеке әдеттерді өзгерту ғана емес, тамақ өнеркәсібі деңгейінде жүйелі шаралар қабылдаудың маңызы зор.
Тұзды тұтынуды азайту – денсаулықты нығайту мен созылмалы аурулардың алдын алудың ең қарапайым әрі тиімді әдісі. Дәрігерлер тұздың орнына түрлі табиғи дәмдеуіштер мен шөптерді қолдануды ұсынады. Мұндай қадам қан қысымын қалыпқа келтіріп, бүйрек пен жүректің қызметін жақсартуға мүмкіндік береді. Салауатты өмір салтын ұстану – ұзақ өмір сүрудің кепілі екенін есте сақтаған абзал.
