Өмір үшін күш біріктіру. Дәл осындай тақырыпта Талдықорған қаласындағы «Ардагерлер» саябағында ЖИТС-тен қайтыс болған адамдарды еске алу халықаралық күніне орай акция өтті.
Еріктілер және жастар ұйымдарының, ҮЕҰ мен «Қос Қанат Жетісу» ЖШС қолдауымен АИТВ-инфекциясының алдын алу жөніндегі облыстық орталығы ұйымдастырған шара жоғары деңгейде өтті. Акция аясында қатысушылар қаза тапқандарды бір минут үнсіздікпен еске алды. Медицина мамандары АИТВ-ға тегін және құпия жедел тестілеу жүргізіп, АИТВ және басқа жыныстық жолмен берілетін инфекциялардың алдын алу бойынша тегін кеңес берілді.
ШЖҚ «Облыстық АИТВ-инфекциясының алдын алу орталығы» МКК-нің директоры Гаухар Уранқаева акцияға қатысқандарға алғыс айтты. «Бұл шара өмірден өткен жандарды еске алумен шектелмейді. Біз адамдарға жан-жақты қолдау білдіреміз. Ең бірінші, өзіне және өзге жандарға жанашыр болуға шақырамыз. Мына жарық дүние мейірімді, жанашыр адамдардың арқасында мәнді екенін әрбір адам ұғынса деймін. Ең бастысы – алтыннан да қымбат денсаулықтың қадірін ерте түсінсек болғаны», – деді ол.
Акцияға қатысушыларға пайдалы мәліметтері бар буклеттер таратылды.
«Жетісу-Ақпарат»
