Жетісу облыстық мәслихатының төрағасы Гүлнар Тойлыбаева бастаған мәслихат депутаттары Римма Салықова және Ермек Егінбаев «Жетісу облысының дін істері басқармасы» мемлекеттік мекемесінің және оған қарасты «Дін саласындағы мәселелерді зерттеу және оңалту орталығы» қызметкерлерімен кездесу өткізді.
Кездесудің негізгі мақсаты – аталған мемлекеттік мекеменің жылдық жұмыс жоспарымен танысып, ұсыныс пікірлерін талқылау. Мекеме жоспарында жалпы діни ахуалға мониторинг жүргізу, реттеу, діни экстремизм мен радикализацияның алдын алу, қоғамда бейбітшілік пен келісім орнату бағытындағы іс-шаралар қамтылған. Қазір Қазақстанда дінге бетбұрушылық екпінді түрде күшейіп келеді.
Нәтижесінде халқымыз өзінің рухани бастауларына қайтадан бет бұра бастады. Міне осындай тарихи кезеңде мекеме қызметкерлерінің ролі ерекше. Кездесу барысында депутаттар мен басқарма қызметкерлері діни саланы реттеу мен оңалту жұмыстарының тиімділігін арттыру үшін қосымша шаралар қабылдауды ұсынып, діни тұрақтылықты нығайту, жастар арасында дұрыс діни түсініктерді қалыптастыру мәселелерін көтерді. Сонымен қатар дін мен мемлекет арасындағы өзара қарым-қатынастар, қоғамдағы діни толеранттылықты сақтау үшін атқарылатын жұмыстар сөз болды.
Мәслихат депутаттары қоғамдағы діни тұрақтылықты қолдауға бағытталған әртүрлі бағдарламалар мен жобаларға өз тараптарынан қолдау көрсететіндерін жеткізді. Мұндай кездесулер дін саласындағы мемлекеттік саясаттың тиімділігін арттыруға, қоғамда діни экстремизм мен радикализацияның алдын алуға ықпал ететіні сөзсіз.
«Жетісу-Ақпарат»
