Қазақстанда игерілмей жатқан және заң талаптарына қайшы берілген ауыл шаруашылығы жерлерін қайтару жұмыстары қарқынды жүргізіліп жатыр. Бұл мәселе Премьер-министрдің орынбасары – Ұлттық экономика министрі Серік Жұманғарин жетекшілік еткен республикалық комиссия отырысында талқыланды, – деп хабарлайды 7-su.kz ақпараттық порталы.
Ауыл шаруашылығы вице-министрі Азат Сұлтановтың айтуынша, жыл басынан бері жалпы аумағы 1 миллион гектарды қамтитын 354 жоспардан тыс тексеру ұйымдастырылған. Тексеру нәтижесінде 500 мың гектарға жуық жерге қатысты 261 заңбұзушылық анықталып, оларды жою жөнінде тиісті нұсқамалар берілген.
Мемлекетке қайтарылған аумақтарды қайтадан ауыл шаруашылығы айналымына қосу және тұрғындарды жайылымдық жермен қамту мәселесіне басымдық беріліп отыр.
Сонымен қатар Мемлекет басшысының тапсырмасына сәйкес, 2026 жылдың ортасына дейін жерлерді кезең-кезеңімен қайта бөлу жоспары жүзеге асуда. 20 сәуірдегі дерек бойынша, жоспарланған 13,5 миллион гектар жердің 10,8 миллион гектары ауыл шаруашылығы айналымына енгізілген. Бірінші тоқсан қорытындысында жоспар 102,3 пайызға орындалған.
