Шегаралы аудандағы Екпінді ауылдық округі әкімшілігінің ұйымдастыруымен Ауылшаруашылығы еңбеккерлері күні аталып өтті. Арнайы келген қонақтар қатарында аудан әкімінің орынбасары Алмас Аханов, аудандық ауылшаруашылығы бөлімінің басшысы Құмар Жұбаев болды.
Мерекелік шарада ауылшаруашылығы өнімдерінен жәрмеңке ұйымдастырылып, көпшілікке арналып көрме қойылды. Алғашқы құттықтау сөзін алған округ әкімі Әділхан Қыстаубаев ауылшаруашылығы еңбеккерлерін мерекемен құттықтап, саладағы ардагер азаматтарға Алғыс хатын табыс етіп, қазіргі кезде де ерен еңбек үлгісін көрсетіп жүргендерді Құрмет грамотасымен марапаттады.
Аудан әкімінің орынбасары Алмас Әлменұлы өз кезегінде туған өлкесінің дамуына ат салысқан, бүгінде құрметті демалысқа шығып отырған зейнеткерлерге аудан әкімінің Алғыс хатын тапсырды. Ауыл ақсақалдары кеңесінің төрағасы Әділхан Досжанұлы мен ауданның Құрметті азаматы Мелс Әбілпейісұлы жерлестерін күзгі мерекемен құттықтап, шаруа қожалықтарына жетістіктерге жете беруді тіледі.
«Майқынов Е» шаруа қожалығының басшысы Ермек Майқынов жиналғандарға жылы лебізін білдіріп, қазіргі таңда ауылшаруашылығы саласына жас мамандарды көбірек тарту керектігіне тоқталды. Құрметті еңбек демалысына шығып отырған Сайран Мейірманов пен Мәдіхан Шариғатовты зейнетке шығуларымен құттықтап, құрметтеп, шапан жауып, ат мінгізді.
Күз беркесін паш еткен салтанатқа арнайы шақырылған аудан өнерпаздары округ жұртшылығына мерекелік концерт қойды. Шаруа қожалықтарының қолдауымен лотерея ұтыс ойындары өткізілді. Ұтысқа тігілген бағалы заттар, төрт түлік, дәнді дақыл өнімдері көптің көңілінен шықты. Округтегі мекеме қызметкерлері мен шаруа қожалықтарының атсалысумен қонақтарға арнайы дастарқан жайылды.
Алмат ЕСЕНБЕКОВ
Алакөл ауданы
