Алматы облыстық мәслихатының кезектен тыс VII сессиясы өтті. Облыс әкімінің орынбасары Жеңіс Тұяқов қатысқан жиында «Алматы облысының 2021-2023 жылдарға арналған облыстық бюджеті туралы» №64-339 шешіміне және облыстық мәслихаттың 2018 жылғы 13 қарашадағы №37-204 «2019-2021 жылдарға арналған Алматы облысында әлеуметтік маңызы бар қатынастардың тізбесін айқындау туралы» шешіміне өзгерістер енгізу мәселелері қаралды. Бұл туралы «Жетісу» газетінің тілшісі хабарлады.
Жиынды сессия төрағасы, мәслихаттың хатшысы Жанболат Жөргенбаев ашып, жүргізіп отырды. Бірінші болып мінберге шығып баяндама жасаған облыстық экономика және бюджеттік жоспарлау басқармасының басшысы Жомарт Әмірханов:
– Облыстық бюджетті нақтылау бойынша бірқатар жобалар енгізіп отырмыз. Сонымен қатар ҚР Үкіметінің 2021 жылғы 27 мамырдағы қаулысына сәйкес Алматы облысының бюджетінен қосымша республикалық трансферттер көзделіп отыр. Жалпыреспубликалық бюджеттен 55 млрд.теңге трансферттер бөлінді. Оның ішінде ағымдағы трансферттер 21,2 млрд.теңге, ал дамытуға деген трансферттер – 33,8 млрд.теңге. Ұлттық қор есебінен 3,1 млрд. теңге кредит бөлінді. «Жұмыспен қамту – 2021» шеңберінде тиісті жобаларды іске асыру үшін мемлекеттік емес эмиссиялық бағалы қағаздар көлемі 5,6 млрд.теңге деп анықталды. Ағымдағы жылдың бірінші жарты жылдығындағы қорытынды бойынша бюджетке түскен кірістер көлемі 114,7 пайызды құрады. Осыны ескере отырып шұғыл шешім талап ететін шығындарды қаржыландыру мақсатында салықтағы түсімдер көлемін 30 млрд.теңгеге арттыруға ұсыныс енгізілді, – деді.
Аталған қаржы әр салаға бөлінеді, ел игілігіне жұмсалады. Мәселен, Ескелді, Қарасай, Қаратал, Сарқан, Көксу аудандарындағы бес мектептің құрылысына 652 миллион теңге, сондай-ақ, Райымбек ауданындағы Қарасаз ауылында салынатын Өнер мектебіне 20 миллион, Үштөбе қаласындағы колледж құрылысына 50 миллион теңге қарастырылған. Мысал келтіргеніміз білім мен мәдениет саласы. Ал туризм, денсаулық, жұмыспен қамту сияқты, тағы басқа жобаларға нақты жоспар дайындалған, бюджеттен қаржы бөлінген. Бөлінген қаржы халық игілігіне жарауы тиіс.
Екінші болып баяндама жасаған облыстық жолаушы көлігі және автомобиль жолдары басқармасы басшысының міндетін атқарушы Серік Сармұратов:
– Сіздерге облыстық мәслихаттың шешімді жобасын ұсынып отырмыз. Аталған шешімдік жобаны қабылдау мақсатында қолданыстағы маршруттарға әлеуметтік мәртебе беріледі. Әлеуметтік мәні бар бұл тізімге қосымша 52 маршрут енгізіліп отыр, – деді.
Сөз арасында Жанболат Әкебайұлы аталған ұсыныстар мәслихаттың экономикалық, бюджет, құқықтық тәртіп, сыбайлас жемқорлыққа қарсы күрес, депутаттық өкілеттіктермен, этика мәселелері бойынша және индустриялық, инновациялық, көліктік логистикалық даму және кіші бизнесті, туризм мен спортты қолдау мәселелері бойынша тұрақты комиссияның бірлескен отырысында талқыланып, мақұлданғандығын жеткізді.
Жиынға келіп қатысқан 12 және онлайн қатысқан 22 депутат тарапынан күн тәртібіндегі екі мәселеге де қолдау білдіріліп, сол бойынша жұмыс жүргізілетіні айтылды.
Серік ҚАНТАЕВ
Алматы облысы
