Күз – береке мен ырыс, несібенің айы. Ала жаздай бел жазбай бейнет қылатын диқандар қауымының молшылыққа кенелер кезі. Қаратал ауданындағы шаруалар арпа-бидай жинап, егін ору қарбаласының бел ортасында жүр.
Қазіргі кезде ауданда 601 гектар күздік және жаздық бидай жинау жұмыстары толығымен аяқталып, 1 122 тонна өнім алынды. Орташа өнімділігі гектарына 18,7 центнер. Сонымен қатар, 2574 гектардан 5150 тонна арпа қамбаға түсті. Әзірге 1744 гектар көкөністің 10 гектары ғана жиналды. Одан 200 тонна өнім алынды. Бақша дақылдарынан 10 гектардан 320 тонна өнім жиналды. 719 гектарға егілген картоптың 5 гектары жиналып, 80 тонна өнім түсті.
Қазіргі таңда шаруашылық мал қыстауларына жемшөп жеткізу және қыстаудағы тұрмыстық үйлер мен мал қораларын жөндеу жұмыстарына кірісуде. Бүгінде 16 488 гектар шабындықтың 2273 гектары шабылды.
Дала жұмыстарына аудан бойынша 35 ауылшаруашылығы тауар өндірушілері 425,6 тонна арзандатылған дизель отынына өтінім берді. Қазіргі кезде 4 шаруа қожалығы 140 тонна дизель отынына келісімшартқа отырды.
Жер-Ананың ырыздығына кенелемін деген шаруалар әлі де егістік басында. Алда үлкен белестер бар.
А. НАЗАРҰЛЫ
