Жыл озған сайын елдің әл-ауқаты артып, халықтың жағдайы жақсарып келеді. Оған түрлі озық үлгідегі бағдарламалар мен сан алуан жаңартылған технологиялардың әр салаға енгізіліп, өмір сүру әлеуетінің ілгерілей бастағаны дәлел. Ел басшысы өзінің республика халқына арнаған әр Жолдауында ел игілігі үшін еңбек етіп, сол жолда жұмыстардың атқарылуын талап етуде. Сол істердің ауқымын кеңейтіп, қарқынын арттыру мақсатында көптеген мемлекеттік бағдарлама қабылданып, біртіндеп жүзеге асырылып жатыр.
Осыған байланысты Қапшағай өңірінде әр тараптанған жұмыстар жүргізіліп келеді. Мәселен, соңғы жылдары «Өңірлерді дамыту» бағдарламасы негізінде бірқатар жоба қолға алынып, тозығы жеткен әлеуметтік нысандар жөндеуден өтті. Жаңа үйлер бой көтеріп, жұмыс орындары ашылды. Бұрын-соңды жасалмаған жолдар жөнделіп, тұрғын үйлердің аулалары ретке келтірілді. Көптеген спорт орындары салынып, нәтижесінде аймақтың әлеуметтік-экономикалық жағдайы жақсарды. Дәл осы бағдарламамен Заречный ауылдық округінде «NurTemirGasStoy» ЖШС демеушілігімен 5,437 млн. теңгеге футбол алаңы салынып, айналасы абаттандырылды. Түнгі уақытта да спортпен шұғылдану үшін жарықдиодты шамдар орнатылып, қолданысқа берілді.
Ал «Бизнестің жол картасы – 2025» мемлекеттік бағдарламасымен бірқатар істер атқарылды. Мәселен, қаланың өнеркәсіп орындары жалпы 73100,0 млн. теңгенің өнімін өндірсе, биыл ол көлемді 89000,0 млн. теңгеге жеткізу жоспарланған. Бүгінгі таңда 54 өндіріс ошағы жұмыс істесе, оның 14 ірі және орта кәсіпорын. Өндіріс орындарының кеңеюіне байланысты жаңа жұмыс орындары ашылып, жергілікті халық жұмыспен қамтылуда. Сонымен бірге «Бизнес бастау», «Жас кәсіпкер» жобасы аясында «Атамекен» кәсіпкерлер палатасында осы жылдың 2 тоқсанынан бастап, онлайн режимде 95 адам оқуға жолданып, 86-сы аяқтады.
Аталмыш мемлекеттік жоба шеңберінің бірінші бағыты бойынша 26,3 млн. теңгеге 45 грант берілді. Оның ішінде «Нұр Отан» партиясының сайлауалды бағдарламасын іске асыру жөніндегі жол картасының «Өзгерістер жолы: әр азаматқа лайықты өмір!» іс-шарасымен жас кәсіпкерлерге жаңа бизнес идеяларды жүзеге асыру үшін берілген 12 грант толық игерілген. Жобаның екінші бағытымен 152,6 млн. теңге сомасына 29 жоба мақұлданды. «Қарапайым заттар экономикасы» бағдарламасы аясында жалпы 10 жобаға өтінім келіп, оның 8-і мақұлданған. Осы жобалар бойынша «Қапшағай Бидай Өнімдері» рапс майын өндіруге, «Төреқұлов А.Т» шаруа қожалығы ет бағытындағы жылқылар сатып алуға, «АГРОФУД» ЖШС жем қоспаларын өндіруге, «ЮНИПАК ШЫМКЕНТ» пластикалық контейнерлер шығаруға, «ГринЛэндАлатау» және «ЛСТ АГРО» ЖШС жылыжай кешендерін ұлғайтуға жобалар құрылып, рұқсат берілген.
ҚР Денсаулық сақтау саласын дамытудың 2020 – 2025 жылдарға арналған бағдарламасын іске асыру бойынша атқарылған жұмыстар жетерлік. Жалпы, халық денсаулығына, оның өмір сүру ұзақтығын арттыруға сала мамандары да көмек қолдарын созып, барлық жағдай жасап жатыр. Мысалы, балалар, қарт адамдар, осал топтағы азаматтарға медициналық көмекке қолжетімділікті арттыруда. Бұдан басқа, Міндетті әлеуметтік медициналық сақтандыру жүйесіне көшу жұмыстары жүйелі жүргізіліп, тұрғындарды медициналық көмек, дәрі-дәрмекпен қамту істері атқарылуда. Жергілікті аурухана қажетті жабдықтармен толықты. Жергілікті халықтың саулығын көтеру үшін 2025 жылға қарай оңалту жолдарын қарастыру ішінде тиісті құралдар мен жаттығу залы бар жеке корпус ашу жоспарланған. Сондай-ақ, медицина қызметкерлерінің біліктілігін арттыру және артықшылықтарын кеңейту есебінен жедел көмек беру түрлерін ұлғайтуға басты назар аударылған.
Осыған орай, Алматы мен Алматы облысының жетекші мамандарымен тығыз байланыс орнатылып, тәжірибелік істер жолға қойылды. Аурухана қызметкерлері үздіксіз оқуға жіберіліп, білім мен біліктілікті арттыру жұмыстары жүргізілуде. Соңғы уақытта жайылған індет кезіне де емхана керекті дәрілік заттармен, түрлі аппаратпен қамтылды. Елде озық технологияларды меңгеріп, заманауи жүйе сауаттылығын жоғарылатуға көңіл бөлініп келеді. Бұл мақсатты орындауда «Цифрлы Қазақстан» бағдарламасы негізінде салаларда алуан жобалар енгізілуде.
Қапшағай қалалық ауруханасы қазіргі күні қағазбастылықтан алшақтап, компьютерлік жеңілдетілген жүйемен тұрғындарды есепке алу, медициналық суреттерді цифрлы форматпен жүргізу, сәулелі, томографиялық сараптау құралдарының күшімен аурулар дер кезінде анықталып, оның асқынуының алдын алуға мүмкіндіктер берілуде. Бұл бағыттың көкжиегін кеңейтуде қала мен Шеңгелді округінде ашылған «Сервистік әкімдік» орталықтандырылған жүйесінің оңтайлылығын тұрғындар сезінуде. Әсіресе, шалғай ауыл азаматтарына ыңғайлы болғаны анық. Олар кез келген өтініштерін мәселелеріне қарай «Е-өтініш» жүйесімен элктронды түрде жолдап, қажетті жауапты ешқайда бармай-ақ алады.
Көпшілігіне ыңғайлы форматпен Қапшағай қаласының тауарлар мен көрсетілетін қызметтердің сапасы мен қауіпсіздігін бақылау басқармасына «Е-лицензиялау» жүйесімен 50-ден аса өтініш түсіп, оның 45-нің құжаттарының толық болмауы салдарынан иелеріне қайтарылған. «Е-өтініш» бойынша 58 арыз қабылданып, тексеру нәтижесінде 32 291 190 теңге болатын 137 әкімшілік іс жүргізу жұмысы анықталған. Оның біреуі «Сот бөлмесі» жүйесімен электронды құқық органдарына жіберілген. Оңтайлы жүйенің арқасында сервистік орталықтар арқылы өңір жұртшылығына 11 мың 889 мемлекеттік қызмет көрсетіліп, соның 11 мыңынан астамы жеке тұлғаларға, 600-ге жуығы заңды тұлғаларға көрсетілген. Мемлекеттік корпорациясымен 2844, электронды түрде 8596 қызмет көрсетілген.
Жалпы аймақта 34 өзіне-өзі қызмет көрсету бұрышы бар. Қаланың өзінде 6 мемлекеттік бөлім мамандары әкімдік ғимаратындағы орталықта 57 қызмет түрі бойынша келушілерге көмек береді.
Айгүл БАЙБОСЫНОВА
Қапшағай қаласы
