Облыстық мәслихат депутаттарының қатысуымен тексеру комиссиясының кезекті отырысы өтті. Онда Ескелді ауданының жергілікті бюджетті жоспарлау, бөлінген бюджет қаражатының және мемлекет активтерінің қалай пайдаланылғаны жайында жүргізілген мемлекеттік аудиттің қорытындылары қаралды.
Белгілі болғандай, Ескелді ауданы бойынша бюджет қаражаты есебінен салаларда қарастырылған 2 819,3 млн. теңге мемлекеттік аудитпен қамтылған. Мемлекеттік аудитор Ғалымжан Төребековтың айтуынша, мақсат-міндетті орындау кезінде айтарлықтай кемшіліктер жіберілген. Мәселен, жалпы 1 568,1 млн. теңгеге бұзушылықтар анықталып, оның 727,8 млн. теңгесі қаржылық бұзушылықтар болған.
Сонымен бірге бюджет қаражатын тиімсіз пайдалану, тиімсіз жоспарлау бұзушылықтары орын алған. Бюджет қаражаты мен мемлекет активтерін пайдалану кезінде нормативтік-құқықтық актілерді сақтамау салдарынан бухгалтерлік есеп жүргізудің жүйелі бұзылуына жол берілген.
Еңбек заңнамаларын сақтамау салдарынан мемлекеттік аудит нысандарының қызметкерлеріне негізсіз артық қаражат төлеу және жалақы есебінен аванс түрінде берілген қаражатты ұстамау дерегі орын алған. Бұған қоса, мемлекеттік сатып алу туралы заңнама нормаларын қолданбастан жеткізушілермен шарт жасасу дерегі бар. Яғни, жекелеген жеткізушілердің мүдделері жоғары қойылған, бұл өз кезегінде сыбайлас жемқорлық тәуекелдерін туғызуы мүмкін. Сондай-ақ, есепке алынуы тиіс активтер уақытылы есепке алынбай, есептің бұрмалануына, нақты атқарылған жұмыстарға бюджет қаражатының негізсіз және артық аударылуына жол берілген.
Анықталған бұзушылықтар бойынша мемлекеттік аудит нысандары лауазымды тұлғаларының әкімшілік жауапкершілігін қарастыру мақсатында ҚР Қаржы министрлігі Ішкі мемлекеттік аудит комитетінің облыс бойынша ішкі мемлекеттік аудит департаментіне 4 мемлекеттік аудит нысаны бойынша материалдар жолданып, ҚР «Әкімшілік құқықбұзушылық туралы Кодексінің» 238-бабы бойынша 6 әкімшілік айыппұл, 207-бабының 10-тармағы, 3-тармақшасына сәйкес 4 әкімшілік айыппұл, 207-бабының 11-тармағына сәйкес 1 әкімшілік айыппұл және облыс бойынша тексеру комиссиясы тарапынан 234-1-бабы талабына сәйкес 1 әкімшілік айыппұл салынған.
Айгүл БАЙБОСЫНОВА
