Бассейндер мен лотерея клубтары және туризм нысандары «Ashyq» жобасына қосылды. Аймақта барлығы 740 нысан аталған қосымшаны өз қызметіне енгізді.
Облыстық кәсіпкерлер палатасының директоры Әсет Шаяхметов 740 нысанның 616-сы жоба қатысушысы, 124-і сынақ режимінде жұмыс істейтінін айтты.
– Аталған жоба бойынша бірқатар қоғамдық тамақтандыру орталықтары, туристік нысандар, бассейндер, сонымен бірге, «Азаматтарға арналған үкімет» мемлекеттік корпорациясының филиалдары, Талдықорған қаласының әкімдігі мен әуежайы жұмыс істей бастады. Цифрлық платформаға туризм, мәдениет, спорт және санаторий-курорттық мақсаттағы нысандар, демалыс үйлері белсенді түрде қосылуда. Қазір келушілер мен мекеме қызметкерлеріне ыңғайлы болу үшін «Ashyq» қосымшасын ғана емес, сонымен қатар Аitu қосымшасын, Kaspi.kz және Halyk Homebank банк қосымшаларын да қолдануға болады, – дейді Әсет Шаяхметов.
Облыстық санитарлық-эпидемиологиялық бақылау департаментінде атап өтілгендей, қосымшаның арқасында облыста 103 азаматтан «қызыл» және «сары» мәртебе анықталған. Соның ішінде Талдықорған қаласында 57 «сары» және 36 «қызыл» мәртебесі, Панфилов ауданында бір «қызыл» және үш «сары» мәртебесі, Ескелді ауданында бір «қызыл» және екі «сары», Қарасай ауданында бір «қызыл», бір «сары» және Еңбекшіқазақ ауданында бір «сары» мәртебесі бар адам анықталды.
А. Байжұмақызы
