Премьер-Министр Асқар МАМИННІҢ төрағалығымен өткен Үкімет отырысында Дүниежүзілік банктің «Doing Business» және басқа да рейтингтердегі Қазақстанның позицияларын көтеру шаралары қаралды. Жамбыл облысы тұрғындарының табысын арттыру бойынша пилоттық жоба мәселесі де осы жиында талқыланды.
Жиында белгілі болғанындай, «Doing Business» бизнесті жүргізу жеңілдігі рейтингінде Қазақстан әлемнің 140 елінің ішінде 28-орынға ие болған. Қазақстан аймақтары бөлінісінде бизнесті жүргізу жағдайлары бойынша Алматы, Ақтау және Ақтөбе қалалары көш бастап тұр. Қазақстан «Құрылысқа рұқсат алу» индикаторы бойынша 35-ші орынды иеленіп, 17 позицияға көтерілген. «Халықаралық сауда» индикаторы бойынша Қазақстан өткен жылмен салыстырғанда 123-орыннан 21 позицияға көтеріліп, 102-орынды иеленген, «Сауда және көлік инфрақұрылымының дамуы» рейтингінде 71-орында. Қазақстан математика және жаратылыстану пәндерінен академиялық білім бойынша 10 жетекші елдің қатарына кірген.
Осы ретте Үкімет басшысы: «Қазіргі кезде Қазақстан бизнес жүргізу жеңілдігі бойынша рейтингте әлемнің 190 елі арасында 28-орында. Жалпы, бұл рейтинг бизнесті жүргізу шарттарын жеңілдетуге бағытталған реформалардың қаншалықты тиімді екенін көрсетеді. Бұл, әрине, еліміздің инвестициялық тартымдылығына ықпал етеді және жаңа жобалар мен өндірістерді құруға қатысты мүмкіндіктерді білуге жол ашады», – деді.
Асқар Ұзақбайұлы, сондай-ақ, Қазақстанның халықаралық рейтингтердегі позициясын одан әрі жақсарту үшін бір ай мерзімде қолда бар іс-шаралар жоспарларын өзектендіріп, жаңа іс-шаралар жоспарын қабылдауды, бағдарламалық құжаттарда осы рейтингтерде Қазақстанның ұстанымын жақсарту жөніндегі нысаналы индикаторларды бекіту мәселесін пысықтауды тапсырды. Бұдан өзге, қалалар мен облыстардың әкімдеріне жүргізіліп жатқан реформаларды іске асыру және бизнес жүргізуге, инвестициялар тартуға қолайлы жағдайлар жасауды, инфрақұрылымды дамыту бойынша жұмысты күшейтуді міндеттеп, Қазақстанның халықаралық рейтингтердегі орны мәселесі Үкіметтің жобалық кеңсесінің тұрақты бақылауында болатынын назарға салды.
Бұдан соң ауылдарда жеке қосалқы шаруашылықтарды қолдау арқылы Жамбыл облысы тұрғындарының табысын арттыру бойынша пилоттық жобаны іске асыру жолдары қаралды. Мемлекет басшысы Қасым-Жомарт Тоқаевтың аталған пилоттық жоба бойынша тапсырмаларын іске асыру тетігін әзірлеу бойынша атқарылған жұмыстар баяндалды.
Жоба төмендегі бағыттар бойынша мемлекеттік қолдау шараларын қарастырмақ. Олар – өсімдік шаруашылығын, мал және құс шаруашылығын дамыту үшін үй іргесіндегі телімдерді тиімді пайдалану, сондай-ақ, елді мекендерден тыс жерлерде әр ауыл тұрғынына тиесілі жер ресурстарын тиімді пайдалану, әр ауылдық округте қажетті техника, құрал-жабдықтармен және айналым қаражаттарымен кооператив құру.
Пилоттық жобаны іске асыруға 2020 жылдың соңына дейін игеру кезеңімен шамамен 46,4 млрд. теңге қажет. Биыл бастапқы кезеңде облыстың 10 ауданының 10 ауылдық округіне 7,2 млрд. теңге керек, оларды 2459 шағын несие беруге, оның ішінде 492 стартап-жобаға беруге бағыттау көзделген. Шағын несиелерді ауылдық елді мекендерде және шағын қалаларда соңғы қарыз алушыға жылдық 2,5 пайыз және 7 жылдан аспайтын мерзімге беру жоспарлануда.
Үкімет басшысы ҚР Ауылшаруашылығы мен ҚР Еңбек және халықты әлеуметтік қорғау министрліктеріне қыркүйек айының соңына дейін пилоттық жобаны іске асыру тетігін қарауға енгізіп, сондай-ақ, жарияланған көрсеткіштерге уақытылы қол жеткізудің тиісті бақылауын қамтамасыз етуді тапсырды.
Айгүл БАЙБОСЫНОВА
Сурет ғаламтордан алынды
