Облыстық кәсіпкерлер палатасы жанындағы салалық сауда кеңесінің кезекті отырысы отандық тауарлар мен өнімдердің сауда сөрелерінде қолжетімділігін қамтамасыз ету жөніндегі тәртіптер және ішкі сауда субъектілеріне жеке кәсіпкерлікті мемлекеттік қолдау шараларын көрсету қағидаларының мазмұнын түсіндіруге арналды.
Отырыс мемлекеттік органдар, ірі сауда желілері, көтерме және бөлшек сауда нысандары, оның ішінде үй жанындағы дүкендер желісі өкілдерінің қатысуымен өтті. Облыс бойынша сауда және тұтынушылардың құқықтарын қорғау департаментінің басшысы Айдос Дауешев ішкі сауда ережелеріне сәйкес сауда желілері мен базарларды ұйымдастыру кезінде саудагерлер сөрелерге отандық тауарларды орналастыратын және азық-түлік қойылатын сауда сөрелерінің жалпы алаңы кемінде 30%-ды құрауы тиіс екенін атап өтті.
Ішкі сауда субъектілеріне мемлекеттік қолдау шараларын көрсету қағидаларын түсіндіру кезінде екінші деңгейлі банктер ішкі сауда субъектілеріне беретін несиелер бойынша субсидиялау және кепілдік беру туралы ережелеріне баса назар аударылды. Өйткені бұл шаралар кәсіпкерлер үшін қаржылық қолжетімділікті жақсартуға және нарықта тұрақтылықты сақтауға бағытталғаны айтылды. Салалық сауда кеңесінің төрағасы Эдиль Казакпаев осы саладағы бәсекелестіктің өсуі жағдайында сауда субъектілері үшін мемлекеттік қолдау шараларының маңыздылығын атап өтті.
Отырыс барысында жаңа жылдық мерекелер қарсаңында әлеуметтік маңызы бар азық-түлік тауарлары бағасының асып кетуіне жол берілмейтіні аталып өтті. Сондай-ақ, «Сауда қызметін реттеу туралы» ҚР Заңының 9-бабына сілтеме келтіріле отырып, кәсіпкерлерге әлеуметтік маңызы бар азық-түлік тауарларына шекті сауда үстемесінің рұқсат етілген мөлшері өндірушінің сату бағасынан немесе көтерме жеткізушінің сатып алу құнынан 15% -дан аспауы тиіс екені еске салынды. Сондай-ақ, әлеуметтік маңызы бар тауарларға шекті рұқсат етілген бөлшек сауда бағасын асырғаны үшін жауапқа тартылатыны ескертілді.
А. БАЙЖҰМАҚЫЗЫ
