Елімізде жүргізіліп жатқан реформалар бірінші кезекте қазақстандықтардың әл-ауқатынан көрініс табуы тиіс. Бұл биылғы Жолдаудың басты тақырыбы. Мемлекет басшысы кәсіпкерлікті қолдау мен дамытуға ерекше назар аударып отыр. Шағын және орта бизнес, әсіресе шикізаттық емес сектор үшін несиелендірудің қолжетімділігі өте өзекті мәселе және бұл дер кезінде көтерілді.
Президент нақты міндет қойды: бірінші кезекте қажетті барлық тауар ел ішінде өндірілуі тиіс. Олар азық-түлік, киім-кешек, аяқкиім, жиһаз. Бұл тек тапсырма ғана емес, отандық өндірушілерді қолдау бойынша нақты шешімдер. Импорт алмастыруды өркендету Қазақстанның әлеуметтік-экономикалық әл-ауқатының жандануына оң септігін тигізеді. Валюта бағамының тұрақсыздығынан импорт қымбаттап отыр. Бұл халықтың қалтасына әсер етуде. Сондықтан, мұндай тәуелділікті болдырмау үшін халық тұтынатын бірінші кезектегі тауарларды елде шығару керек. Екіншіден, отандық өндірістерді қолдау – бұл азаматтарымыздың жұмыспен қамтылуын қамтамасыз ету болып саналады. Кәсіпорындар тапсырыспен жұмыс істейді, олар салық төлейді, елде жаңа жұмыс орындары пайда болады.
Ағымдағы жылы «Атамекен» сегіз сала бойынша екі мыңнан аса кәсіпорынды паспорттауды жүргізді. Сауалнама компаниялардың өндірістік қуаттарының жүктелім деңгейінің жеткіліксіздігін көрсетті, ол небәрі 57 пайыз. Бұл кәсіпорындар Мемлекет тарапынан қосымша тапсырыстарды қажет етеді. Президент көтерген бұл мәселе шешіледі және «Атамекен» осы бағытта Үкіметпен бірлесіп жұмыс істеуге дайын. Қазақстандағы өнеркәсіптік кәсіпорындардың өзекті проблемасының бірі – ұзақмерзімді қаржыландыруға қолжетімділіктің болмауы. Екінші деңгейлі банктер тарапынан қысқамерзімді және жоғары пайыздық мөлшерлемемен несие берудің қазіргі шарттары бизнесті дамытуға және жаңғыртуға көмектеспейді.
Осы ретте Президент бұл мақсатқа 600 млрд. теңге бөлінетінін және қаражат халық тұтынатын тауарларды шығаратын жобаларға ғана берілетінін айтты.
Қаражатты бөлу Үкіметтің қатаң бақылауында болады. Біз өз тарапымыздан белгілі бір міндеттемелерді алатын кәсіпорындардың тізімін ұсынуға дайынбыз. Президент Жолдауының негізгі тақырыптарының бірі – бизнеске салықтық рақымшылық жасау қажеттігі туралы тапсырма. Бизнес қауымдастығы бұл үшін Мемлекет басшысына дән риза.
Ұлттық палата да, Жолдауда айтылғандай, адами капиталды дамытуға, атап айтқанда болашақ мамандарды оқыту сапасына және оларды одан әрі жұмысқа орналастыруға дер кезінде баса назар аудару керек. Дәл осы нарық оқу бағдарламаларының сапасына баға беруі тиіс және мемлекеттік тапсырыс тек сұранысқа ие кадрларды дайындайтын колледждер мен жоғары оқу орындары арасында бөлінуі тиіс. Бұл маңызды мәселе. Мемлекет басшысы орта және жоғары білім беру ұйымдары үшін негізгі критерий – түлектерінің жұмысқа орналасуы екендігін атап айтты. «Атамекен» бұл тұжырымды толық қолдайды.
Абылай МЫРЗАХМЕТОВ,
«Атамекен» ҚР ҰКП басқармасының төрағасы
