Текелідегі «Болашақ-БСЕ» жауапкершілігі шектеулі серіктестігі жұмысы автоматтандырылған жаңа бетон зауытын іске қосты.
Кәсіпорын бұған дейін карьерден әкелінген шикізатты өңдеп, қиыршық тас, құмтас секілді инертті материалдарды өндіретін. Енді итальяндық құрылғылармен жабдықталған бетон араластырғыш цехтан М50-ден М450-ге дейінгі маркадағы тауарлы бетон шығарылады.
«Өндіріс қуаттылығына келсек, бір ауысымда 500 текше метр тауарлы бетон шығарамыз. Өнімге сұраныс жоғары. Текелі тау-кен өңдеу кешені, «Текелийский энергокомплекс» ЖШС және қаладағы бірнеше мердігер ұйымдардың тапсырысын орындап жатырмыз. Сондай-ақ, көршілес ауылдарда тұтынушыларымыз бар. Текеліде көпқабатты үй құрылысы қарқынды. Келешекте туризмді дамыту аясында іргелі жобалар жүзеге асырылмақ. Соның барлығына біз өз өнімімізді ұсынамыз. Қазіргі таңда кәсіпорында жұмыс күші жеткілікті. Алдағы уақытта өндірісті кеңейтіп, жұмысшы санын арттыруды көздеп отырмыз», – дейді «Болашақ-БСЕ» ЖШС атқарушы директоры Болат Белдібеков.
Ж. ӘБДІМАНАПҚЫЗЫ
Текелі қаласы
