Былтыр Қазақстанның автокөлік өнеркәсібіндегі өндіріс көлемі 1,9 триллион теңгеге жетті. 2023 жылы бұл көрсеткіш 1,8 триллион теңге болған. Өндіріс көлемінің жартысынан көбі Allur зауыты орналасқан Қостанай облысына тиесілі. Бұл туралы Energyprom.kz сайты хабарлады.
Қазақстан автокөлік өнеркәсібі өндірісінің басым бөлігі, яғни 1 триллион теңгесі Қостанай облысына тиесілі. Мұнда еліміздің ең ірі автомобиль зауыты — Allur орналасқан.
Алматы қаласындағы автомобиль өнеркәсібінің өндіріс көлемі – 567,9 миллиард теңге. Бұл қалада Hyundai Trans Kazakhstan және Hyundai Trans Auto автозауыттары істейді. Ал QazTehna автозауыты орналасқан Қарағанды облысындағы өндіріс көлемі 130,6 миллиард теңгеге жетті. Қалған өңірлердің үлесі автокөлік, тіркеме және жартылай тіркеме өндірісінің жалпы көлемінің 10%-ынан астамына тең.
Автокөлік өнеркәсібі — басты драйвер
Қазақстанның машина жасау саласында автокөлік өндірісі маңызды рөл атқарады. 2024 жылдың қорытындысы бойынша, автоөндірістің машина жасау саласындағы үлесі – 41%, елде өңделетін барлық өнеркәсіптегі үлесі — 8%.
Бұл көрсеткіш өңірлерде одан да жоғары. Мәселен, Қостанай облысында автомобиль өндірісі машина жасау саласының 85,2%-ына, аймақтағы өңделетін барлық өнеркәсіптің жартысына тең. Алматыда автоөндірістің машина жасауда үлесі — 72,3%, мегаполисте өңделетін барлық өнеркәсіптегі үлесі — шамамен 30%.
Алдағы уақытта автомобиль өндірісінің осы салалардағы үлесі одан әрі өседі деген болжам бар. 2024 жылы автомобиль өнеркәсібіне салынған инвестициялар 189,8 миллиард теңгеге жетті. Бұл 2019 жылмен салыстырғанда 21 есе, ал 2023 жылмен салыстырғанда 5,3 есе көп.
Былтыр Қазақстанда қанша автокөлік жасалды?
2024 жылы Қазақстанда 144,7 мың автомобиль өндірілді. Бұл көрсеткіш 2023 жылмен салыстырғанда 2%-ға аз. Өндірілген көліктердің 63%-ы Allur зауытына тиесілі. Олар бір жылда 90,5 мың транспорт техникасын жасап шығарды. Айта кетері, Allur автозауыты автоөндірістегі үлесін төрт жыл қатарынан 61-63% аралығында көрсетіп отыр.
Екінші орында Hyundai Trans Kazakhstan алды. Олар 45,4 мың автомобиль (31,4%) өндірген. Олардың бұл көрсеткіші 2023 жылмен салыстырғанда 7,1%-ға аз. Қалған автозауыттар 8,8 мың автомобиль шығарды.
Қанша автокөлік сатылды?
Сектордағы өндірістің аздап төмендегеніне қарамастан, 2024 жылы жаңа, жеңіл әрі коммерциялық 205,1 мың көлік сатылды. Осылай, сатылым 3,2%-ға өсті.
Әсіресе, жылдың төртінші тоқсанында 68,1 мың автокөлік сатылып, рекорд нәтиже көрсетті. Бұл өткен тоқсанмен салыстырғанда 26,1%-ға және бір жыл бұрынғыдан 12,2%-ға көп.
Жылдың төртінші тоқсанында жаңа авткөліктерді ең көп сатқан – Allur автозауыты. Осы аралықта нарықта сатылған көліктің 42,6%-ын Allur зауыты сатты. 2024 жылдың қорытындысы бойынша, бұл автозауыттың жалпы үлесі – 38,3%.
2024 жылдың желтоқсанында ғана 25,6 мың жаңа жеңіл және коммерциялық автомобиль сатылып, бір айдағы сатылым бойынша рекорд орнатылды. Желтоқсанда сатылым 22%-ға, ал 2023 жылдың желтоқсанымен салыстырғанда 8,7%-ға артты.
2024 жылы Astana Motorst-тың Hyundai (44,2 мың) және Allur автозауытының Chevrolet (30,9 мың) және Kia (23 мың) көлігі сұранысқа ие болды. Allur-дың Chevrolet Cobalt (26,5 мың), JAC (11,8 мың), Jetour (9,5 мың) брендтері де жиі сатылды.
Фото: Energyprom.kz
