Облыстық мәслихат депутаттарының қатысуымен тексеру комиссиясының кезекті отырысы өтті. Онда облыстағы ауыл-шаруашылығы қызметін ұйымдастыруға бөлінген бюджет қаражатының қалай пайдаланылғаны және осыған байланысты жүргізілген мемлекеттік аудиттің қорытындылары қаралды. Бұл туралы облыс бойынша тексеру комиссиясының бас инспекторы – мемлекеттік аудитор Ғабит Қазақбеков айтып берді.
– Ғабит Зәкіржанұлы, әңгімені аудиторлық іс-шараны жүргізген топ жетекшісі ретінде жергілікті атқару органдарының борышы мен алынған несиелерден бастасаңыз?
– Аудиторлық іс-шара облыстық ауылшаруашылығы басқармасында алдыңғы жылдың 6 шілдесінен бастап, өткен жылдың 31 желтоқсан аралығында жүргізілді. Облыстық ауылшаруашылығы басқармасы бойынша бюджет қаражатының 2 980 478,6 мың теңгесі мемлекеттік аудитпен қамтылды. Нәтижесінде 613 389,8 мың теңге қаржылық бұзушылықтар, 2 720 518,3 мың теңге бюджет қаражатын тиімсіз жоспарлау, 2 009,8 мың теңге көлемінде экономикалық шығындар және 17 бірлік рәсімдік сипаттағы бұзушылықтар анықталды.
– Аудит барысында қандай бұ-зушылықтарға жол берілген?
– ҚР Бюджет кодексінің 97-бабы 3-тармағының және ҚР Ауылшаруашылығы министрінің 2020 жылғы 30 наурыздағы №107 бұйрығымен бекітілген «Өсімдік шаруашылығы өнімінің шығымдылығы мен сапасын арттыруды субсидиялау қағидаларының» талаптары сақталмай, төлем негізділігін растайтын құжаттар толық тексерілмей, 6 206,5 мың теңге бюджеттік субсидиялар түпкілікті алушыларға аударылған.
Сондай-ақ, ҚР Ауылшаруашылығы министрінің 2018 жылғы 23 шілдедегі № 317 бұйрығымен бекітілген «Инвестициялық салымдар кезінде агроөнеркәсіптік кешен субъектісі шеккен шығыстардың бір бөлігін өтеу бойынша субсидиялау қағидаларының» талаптары сақталмаған. Агроөнеркәсіптік кешен субъектісінің инвестиция салу кезінде шеккен шығыс- тарының бір бөлігін (50%) субсидиялауда, инвестициялық жоба паспорты бойынша құжаттарды тексеру, сатып алынған жабдық пен жобалар паспорттарында көзделген шарттарға сәйкестігін қарап-тексеру кезінде аталған жабдықтың бар-жоғы тексерілмей, өндірістік қуаттардың жүктелуіне қол жеткізілгенін дәлелдейтін фото және бейнематериалдармен расталмай, қарап-тексеру актілері жасалған. Сонымен бірге инвестициялық жобаның, ұсынылған материалдардың, объектілердің, деректер мен мәліметтердің белгіленген талаптарға сәйкестігі анықталмай, инвестициялық субсидияларды беруге негізсіз оң шешім шығарылып, 607 203,3 мың теңге көлемінде инвестициялық субсидиялардың негізсіз төленгені анықталды.
– Субсидиялаудың негізгі мақсат-міндетіне қысқаша тоқталасыз ба?
– Мұндағы басты мақсат-міндет – салынған инвестициялардың өзін-өзі ақтауы, сол арқылы ауылшаруашылығының басым бағыттарындағы тауарларға, жұмыстарға және көрсетілетін қызметтерге қолжетімділікті арттыру. Жоғарыда аталған инвестициялық жобалар бойынша инвестиция объектілері жұмыс істемей, аталған мақсат-міндеттер орындалмаған және түпкі нәтижеге қол жеткізілмеген. Осыған байланыс- ты тексеру комиссиясының қаулысы қабылданып, аудит объектілеріне тиісті тапсырмалар мен ұсынымдар берілді.
– Әңгімеңізге рахмет!
Айгүл БАЙЖҰМАҚЫЗЫ
