Өңірлік кәсіпкерлер палатасының конференц залында Алматы облыстық кәсіпкерлік басқармасы «QazTrade» АҚ-мен бірлесіп, өңірлік экспорттық кеңестің отырысын өткізді. Айта кетейік, аталған кеңес облыс әкімдігінің қаулысымен өңірлік деңгейде экспортты дамыту және ілгерілету жөніндегі мемлекеттік саясатты іске асыру мақсатында құрылған. Кеңес құрамына мүдделі мемлекеттік органдар, кәсіпкерлер палатасының және облыстың экспорттаушы кәсіпорындарының өкілдері кіреді.
Экспорттық кеңес отырысына «QazTrade» АҚ өкілдері, өңірлік экспорттық кеңес мүшелері, кәсіпорындар, аудандар мен қалалар әкімдіктерінің, өңірлік кәсіпкерлер палатасының өкілдері қатысты. Жиында алдымен облыс әкімінің орынбасары Серік Тұрдалиев сөз сөйлеп, күн тәртібінде қаралатын мәселелермен таныстырды. Бұдан соң онлайн тәртіпте байланысқа шыққан ҚР Сауда және интеграция вице-министрі Қайрат Төребаев сөз алды. Өңірлік экспорттық стратегияны әзірлеу бойынша жүргізіліп жатқан жұмыстар жөнінде «UZAID» өкілі Сәуле Ахметова әңгімеледі. Отырыста сондай-ақ, «QazTrade» АҚ қызметінің негізгі бағыттары және оны мемлекеттік қолдау шаралары, 2025 жылға дейін шикізаттық емес экспорт көлемін 41 млрд. долларға дейін жеткізу мақсат етіліп отырғаны айтылды.
Бүгінгі таңда аймақта экспорт динамикасы өсе түсуде. Экспорттық жеткізілімдерді қырықтан аса кәсіпорын жүзеге асырады. Экспорт бойынша негізгі сауда әріптестері Ресей, Қырғызстан, Өзбекстан, Түркіменстан және Қытай. Өткен жылы өңдеу өнеркәсібі экспортының көлемі 370,2 млн. АҚШ долларын құрады. Соңғы жылдары «Лепсі өнімдері», «Arba wine», «Империя Фуд», «Алюминий Оф Қазақстан», «Қаратал балық» ЖШС, Текелі тау-кен өңдеу кешені экспортқа шықты.
Отырыста экспорттаушы кәсіпорындардың қажеттіліктеріне талдау жүргізіліп, сыртқы нарықтарға шығуға кедергі келтіретін себептер зерделенді. Сондай-ақ, экспортты дамыту жөнінде ұсыныстар әзірленіп, осы кәсіпорындарға верификация жүргізілді.
Айгүл БАЙБОСЫНОВА
