Қазақстанда суармалы егіншілікті дамыту бағытындағы маңызды жобалардың бірі іске асырылмақ. Америкалық Valmont Industries компаниясы елімізде VALLEY жаңбырлатып суару машиналарын жергілікті өндіруді қолға алады. Бұл туралы Премьер-министрдің орынбасары – Ұлттық экономика министрі Серік Жұманғариннің компанияның Еуразия және Латын Америкасы бойынша аймақтық вице-президенті Филипп Шмидт-Хольцман бастаған делегациямен кездесуі барысында белгілі болды, – деп хабарлайды 7-su.kz ақпараттық порталы.
Кездесу барысында Қазақстандағы суармалы жер көлемін ұлғайту, ауыл шаруашылығына су үнемдеу технологияларын енгізу және жаңбырлатып суару жүйелерін өндіруді жергіліктендіру мәселелері талқыланды.
Серік Жұманғарин суармалы егіншілікті дамыту агроөнеркәсіп кешеніндегі мемлекеттік саясаттың негізгі басымдықтарының бірі екенін атап өтті. Оның айтуынша, елімізде ауыл шаруашылығы жерлерінің әлеуеті жоғары, сондықтан заманауи ирригациялық техниканы өндірудің маңызы зор.
– Мемлекет басшысының суармалы жер көлемін ұлғайту жөніндегі тапсырмасын ескере отырып, ирригациялық техниканы дамыту ерекше маңызға ие. Valmont Industries компаниясының жобасы отандық фермерлер үшін қажетті жабдықтарды жеткізу мерзімін айтарлықтай қысқартуға мүмкіндік береді, – деді вице-премьер.
Қазіргі уақытта VALLEY суару машиналарын жергілікті құрастыру жобасы соңғы іске асыру кезеңіне жеткен. Өндіріс алаңы қазақстандық «Имсталькон» АҚ холдингінің базасында орналастырылған. Мұнда жобаны жүзеге асыруға қажетті инфрақұрылым толық дайын. Атап айтқанда, кәсіпорын аумағында «кеден қоймасы» және «еркін қойма» режимдері енгізілген.
Мамандардың бағалауынша, жоба жоғары нарықтық әлеуетке ие. Мәселен, тек Қарағанды облысының өзінде шамамен 250 жаңбырлатып суару машинасын орнатуға бағытталған жобалар портфелі қалыптасқан. Бұл өз кезегінде 25 мың гектарға жуық ауыл шаруашылығы алқабын суаруға мүмкіндік береді.
Жобаны жүзеге асыру нәтижесінде фермерлер заманауи суару техникаларын жылдам әрі қолжетімді бағамен сатып ала алады. Сонымен қатар өндірісті жергіліктендіру жаңа жұмыс орындарын ашуға, ауыл шаруашылығында су ресурстарын тиімді пайдалануға және өнімділікті арттыруға ықпал етеді.
Кездесу қорытындысында Серік Жұманғарин Ауыл шаруашылығы министрлігіне мүдделі мемлекеттік органдар мен жергілікті атқарушы органдармен бірлесіп, өндірісті жергіліктендіру жұмыстарын жалғастыруды тапсырды. Сондай-ақ фермерлердің заманауи ирригациялық техникаға қолжетімділігін арттыру мақсатында инвесторлармен өзара ынтымақтастықты күшейту қажеттігін айтты.
Сарапшылардың пікірінше, әлемдік тәжірибеде тиімділігін дәлелдеген жаңбырлатып суару жүйелерінің Қазақстанда өндіріле бастауы су тапшылығы жағдайында аграрлық сектордың тұрақты дамуына серпін береді. Бұл бастама су үнемдеу технологияларын кеңінен енгізуге және елдің азық-түлік қауіпсіздігін нығайтуға бағытталған маңызды қадамдардың бірі болмақ.
