Осындай ұсыныс Көктал ауылындағы Есжан Берліқожаұлы атындағы №11 мектепте «Тарихымен тағдырлас Талдықорған» атты кітаптың таныстырылымына орай өткен кездесуде айтылды. Елбасының «Рухани жаңғыру» бағдарламасы аясында жарыққа шыққан кітаптың өлкетануға қосатын үлесі аз болмайтыны белгілі. Өйткені аталмыш кітап осыған дейін бір жарым ғасырдың алдында құрылды деп келген Талдықорған қаласының 1200 жылдық тарихқа ие екендігін дәлелдеп берді. Кездесуді Еркін ауылдық ақсақалдар ұйымының төрағасы Тотай Ісбасқанов жүргізіп, өлкеміздің қадірменді ақсақалдары, кітап авторлары Тұрсын Әбдуәлиев, Таңатар Алшабеков, Әли Ысқабаев, Болат Бисұлтанов кітаптың жазылуы мен зерттелуіне қатысты ойларымен бөлісті. Сонымен қатар, кездесуге келген оқушылардың сұрақтарына жауап берді.
Бүгінде Талдықорған қаласының іргесінде қалаға қарасты бірнеше елді мекен бар. Соның ішінде Еркін ауылының тарихы тым арыда жатыр. Бүгінге дейін аталған ауылдың іргесі 19 ғасырдың соңында ғана қаланды деген түсінік орын алып келеді. Азды-көпті авторлардың ауыл тарихына қатысты жазып-сызғандары болмаса, бұл тақырып кеңінен зерделенген жоқ. Тіпті, әр өлкетанушы ауыл тарихын әртүрлі тұрғыда пайымдап жүр. Кездесуде Еркін ауылының ақсақалдары «Тарихымен тағдырлас Талдықорған» кітабындағы ауыл тарихы туралы жазылған мақаладағы кейбір тарихи фактілердің үйлеспейтіндігін, ауылдың өткені мен бүгінін байланыстыратын дәлелдердің жеткіліксіздігін, көптеген деректің қалып қалғанын алға тартты.
Әрине, біздің тарихымыз көп ретте ауызша таралып, аңыз болып жатталғандықтан көп адам біле бермейтін дәлел мен дәйекті архивтен іздеп табу қиын. Оның үстіне кейбір өлкетанушылар мен тарихшылардың жазбаларындағы толық дәлелдің жоқтығынан өлкетануда шатасудың жиі орын алып жататыны бар. Сондықтан елді мекендер туралы жазылған кейбір еңбекті қайтадан сараптан өткізуге тура келеді. Кездесуде Арыстанбек Бибатыров ағамыз Еркін ауылының айналасындағы елді мекендердің тарихы мен шежіресін, аңызы мен ақиқатын әңгімелеп берді. Ал Еркін ауылдық ақсақалдар кеңесінің төрағасы Тортай Ізбасқанов ауыл тарихына қатысты жиып-терген дүниесін жайып салды. Осыдан іргеде жатқан ауылдың біз білмейтін, білуге тиісті талай тарихты бауырына басып жатқанын түсіндік.
Келесі кезекте сахнаға көтерілген, ұзақ жылдар ауылдың басшылық қызметін арқалаған Ермұхан Байқадамов ағамыз Еркін ауылының өткені мен бүгінін, өзі басшылық етіп тұрған кездегі жағдайын айта келіп, ауылға өлкетану музейінің керектігін алға тартты.
– Еркіндегі әрбір үйде көнеден қалған жәдігерлер жетіп- артылады. Көзі тірі үлкендер оны көзінің қарашығындай сақтап жүр. Ертеңгі жастар соның қадіріне жете ме, жетпей ме? Ол жағы белгісіз. Демек, ауылымыздың өткені мен бүгінін айғақтайтын жәдігерлер сол үлкендермен бірге кететін сияқты. Сондықтан ауылдан өлкетану музейін ашсақ деген ұсынысты көтеріп жүрміз. Егер музей ашылса ауылдастар қолдарындағы жәдігерлерін қуана беретін еді, – дейді ол.
Бұл ұсынысты ардагерлер де қолдап шықты. Тіпті, биыл Еркін ауылынан салынатын Мәдениет үйінің жанынан өлкетану бөлмесі ашылса нұр үстіне нұр болар еді деген үмітте. Егер ондай бөлме ашылса, Еркін ауылының тарихы таңбаланып, ұрпаққа өнеге болар еді. Әрине, «Сын түзелмей, мін түзелмейтінін» білетін халқымыз «Екі өлшеп, бір кесуді де» ұмытпайды. Алдағы уақытта Еркін ауылындағы ақсақалдар ауыл тарихын жазудың салмақты жұмысын қолға алуға уағдаласып тарады.
Қажет АНДАС.
