Жетісу жері ауылшаруашылығы саласын өркендетуге қолайлы аймақ. Түгін тартса майы шығатын мұндай өлке егіннің жайқала өсіп мол өнім беруіне, төрт түліктің басы көбейіп, өрістің малға толуына септігін тигізеді.
Осындай аграрлы аймақта еңбек ететін мамандар алдымен ауылшаруашылығын дамытуға, соның ішінде өңдеу саласын өркендетуге айрықша назар аударып отыр. Агроөнеркәсіп кешенін өркендетуге биыл қомақты қаражат бағытталып, оның басым бөлігі субсидияларға жұмсалған. Сонымен бірге дәнді, майлы, көкөніс және бақша дақылдары мен картоптан ойдағыдай өнім жиналып, күз берекесін тасытты.
Өздеріңізге белгілі, бағалы дақыл саналатын қант қызылшасын өрістетуге де ерекше көңіл бөлініп келеді. Биыл тәтті түбірге арналған егіс алқабы бірнеше есеге ұлғайып, 13,7 мың гектарға жеткізілді. Жаз бойы бел жазбай еңбектеніп, маңдай терлеткеннің арқасында диқандар 635 мың тонна балтамыр жинады. Қант саласын өрістету мақсатында Ақсу қант зауыты толық жөндеуден өтіп, уақытылы пайдалануға берілді.
Облыстың 5 ауданында 8 жаңа сервистік-дайындау орталығы құрылып, бірнеше шаруа қожалығына қант қызылшасы өндірісіне қажет техникалар сатып алынды. Белгілі болғандай, Ақсу қант зауытына Жамбыл облысынан қосымша 100 мың тонна қант қызылшасы қабылданады. Ендігі кезекте екі қант зауытында 94 мың тонна қант өндіріледі деген жоспар бар.
Аймақта мал шаруашылығының да дамуы қарқынды. Төрт түлік саны 2,5 млн. басқа жетті. Нәтижесінде ет, сүт өндірісі өркендеп келеді. Айта кетейік, 2026 жылға дейін 31 инвестициялық жоба жүзеге асады. Соның ішінде бүгінге дейін 4 тауарлы сүт фермасы, 1 бордақылау алаңы, 1 сүт цехы, 7 суару жобасы іске қосылды.
Қазіргі таңда әсіресе су шаруашылығын өркендетудің де маңызы зор. Себебі, бұл саланы агроөнеркәсіптің тынысы деуге болады. Осы ретте жаңа суармалы жерлерді көбейту үшін ирригациялық желілерді қайта жаңарту мақсатында биыл су шаруашылығында 11 нысанның құрылысы жүріп жатыр. Оның төртеуі аяқталды, қалғаны алдағы жылы пайдалануға беріледі. Сөйтіп, 5,3 мың гектар суармалы жер қосылып, 37,1 мың гектар алқапты сумен қамту жақсаратын болады.
Айгүл БАЙБОСЫНОВА
