Тұрғындардың тұрмыс сапасын жақсарту. Халықтың әл-ауқатын арттыру. Әрбір адамның қолайлы өмір сүруіне бар жағдайды жасау. Жетісу өңірінде мемлекеттің осы басым саясатына ерекше көңіл бөлінген. Оның айқын дәлелі – бюджет қаржы қоржынының 58 пайызы тұрғындардың тұрмыс сапасын жақсартуға бағытталып отыр.
Осынша қаржыға өңірде әлеуметтік маңызы бар жұмыстар атқарылуда. Медициналық, спорттық, әлеуметтік нысандар бой көтеріп, коммуналдық мәселелердің тіні тарқауда. Тұрғындардың жайлы һәм қолайлы ортада өмір сүруін қамтамасыз етуде көгілдір отынның қолжетімділігі де маңызды рөл ойнайды. Осы уақытқа дейін өңірде газдандыру қарқынды жүргізілгенмен 3 ауданның тұрғындарына көгілдір отынды пайдаланудың ауылы алыс көрінген. Дейтұрғанмен, бірер жылдан соң Ақсу, Сарқан, Алакөл аудандары мен Ескелді ауданына қарасты бірнеше ауылдың тұрғындары табиғи газды пайдаланбақ. Өйткені, осы жылдың тамыз айынан бастап «Талдықорған– Үшарал» магистральдық газ құбырының құрылысы жүргізілуде.
«Талдықорған –Үшарал» магистральдық газ құбырын салу» инвестициялық жобасын Мемлекет басшысының тапсырмасы бойынша «QazaqGaz» Ұлттық компаниясы іске асыруда. Жоба Үкіметтің 2024 жылғы экономикалық өсуді қамтамасыз ету жөніндегі іс-қимыл жоспарына кіреді. Жетісу жеріне сапарлай келген Үкімет басшысы Олжас Бектенов өңірдің тағы да 124 мың тұрғынын көгілдір отынмен қамтамасыз ететін жоба бастаған-ды. Жуырда Мемлекет басшысының тапсырмасына орай қолға алынған ауқымды бастаманың жұмысын облыс әкімінің орынбасары Әсет Қанағатов таразылап, оң бағасын берді.
– Өңірде тұрғындардың көгілдір отынға қолжетімділігін арттыру бағытында қолға алынған ауқымды жоба арқасында келер жылы 66 елді мекен көгілдір отынның игілігін көрмек. Негізі бұл жобаның аяқталу мерзімі 2026 жылға жоспарланған. Дейтұрғанмен, жүйелі жұмыстың нәтижесінде 2025 жылы «Талдықорған –Үшарал» магис- тралі іске қосылады. Негізгі үш ауданнан бөлек Ескелді ауданының шалғай орналасқан ауылдары осы магистраль арқылы табиғи газға қол жеткізеді. Аймақ басшысы көгілдір отынға қосылатын ауылдардың қатарын көбейтуді тапсырды. Соған сәйкес жоспар аясын кеңейтуді көздеп отырмыз, – деді облыс әкімінің орынбасары Әсет Қанағатов.
Қазір құрылыс жұмыстары Ақсу ауданына қарасты Сағабүйен ауылынан әріге өткен. Шамамен 100 шақырымнан асқан. Негізгі мердігер «Asia Caspian Constraction» серіктестігі мен «Интергаз Орталық Азия» АҚ арасында құрылыс-монтаж жұмысын бірлесіп жүргізуге келісім жасалған. Сол келісім негізінде құрылымның құрылыс басында 90-нан астам техника мен 128 жұмысшысы қарқынды еңбек етуде. «Интергаз Орталық Азия» АҚ бас инженері Меделхан Мырзаханұлының айтуынша, қазір 530 мм. диаметрлік құбырды дәнекерлеу жұмысымен екі колонна айналысуда. Әр колоннада өзі шынжыр табанды 3 дәнекерлеуші энергопойыз қызмет көрсетуде.
– Әр энергопойыздың атқарар өз міндеті бар. Бірі – құбырды бір-біріне жалғайды. Мұны өзектік (коренной) дәнекерлеу дейміз. Екіншісі ыстықты (горячая) және үшіншісі толықтыру немесе бетперде түрінде дәнекерлейді. Дәл мұндай ауқымды дәнекерлеуге себеп – құбырдың қалыңдығының 10 мм. болуы. Күніне әр колонна 1-1,2 шақырым құбырды іске қосады. Шамамен 100-110 құбырды бір-біріне жалғайды, – дейді бас инженер.
Қарашада Жетісу өңірінде ауа райы құбылмалы. Бірде қар, бірде жаңбыр. Соған қарамастан «Талдықорған –Үш- арал» магистралінің жұмысы тоқтаған емес. Себебі, бұл маңда Аян Батыр есімді өз ісінің білгірлері тер төгуде. Айтуынша, осындай мемлекеттік маңызы бар бастамада қолтаңбасын қалдырғанына разы.
– Бірнеше күн ауа райы қолайлы болды. Соңғы екі күнде тіпті өзгеріп сала берді. Алғашында жаңбыр жауды, артынша қар. Қазір сол қардың ызғары жүруде. Қаншама халықтың шаңырағына жылу сыйлайтын жобаға қатысып жатқаныма қуаныштымын. Күннің салқындығында жұмыс істеп жүріп, жоба аяқталғанда халықтан алар алғысымыз бой жылытады, – дейді Аян Батыр.
Жобаны жүзеге асырушылардың айтуынша, магистральдың ұзындығы 302,4 шақырымды құрайды. Осынша ұзындықтағы құбыр бойында 6 газ бұру кондырғысы мен 6 автоматты газ тарату стансысы болады.
Дастанбек САДЫҚ
