Облыс әкімі Бейбіт ИСАБАЕВ ҚР Сыртқы істер министрінің орынбасары Әлібек ҚУАНТЫРОВПЕН, ҚР Сыртқы істер министрінің Инвестициялар комитетінің төрағасы Ғабидолла ОСПАНҚҰЛОВПЕН кездесті. Келелі кездесуде облысқа инвестиция тарту мәселесі талқыланды.
Кездесуде сөз алған аймақ басшысы Жетісу өңірінің инвестициялық потенциялына тоқталып, инвесторлар үшін барлық жағдай қарастырылғанын жеткізді. Облыста 5 стратегиялық бағыт бойынша жаңа инвесторларды тарту, өңірдің инвестициялық тартымдылығын арттыру бойынша атқарылған жұмыспен таныстырды.
– Жетісу облысы жақында ғана құрылды. Бірақ біз өз әлеуетімізді ескере отырып, аймақтың экономикалық дамуын қалыптастырып, кәсіпкерлікті дамыту үшін барлық қажетті жағдайларды жасаудамыз. Агроөнеркәсіп кешені, көлік-логистика, туризм, баламалы энергетика мен өнеркәсіпті дамыту бағыттары бойынша нәтижелі жұмыс жүргізілуде. Инвесторларды қолдау шеңберінде 2023-2024 жылдары бюджет қаражаты есебінен 300 млн. теңге сомаға төрт нысанға инженерлік инфрақұрылым тартылды. Қазіргі уақытта арнайы экономикалық аймақтардың қазіргі инженерлік инфрақұрылымын одан әрі дамыту бойынша жұмыс жоспарлануда. «Қорғас» ШЫХО, «Қорғас – Шығыс қақпасы» АЭА аумағын газдандыру бойынша жобалау-сметалық құжаттама дайындалуда, – деді облыс басшысы.
Жетісу облысының әлеуметтік-экономикалық дамуымен танысқан ҚР СІМ Инвестициялар комитетінің төрағасы Ғабидолла Оспанқұлов елде іске қосылған ұлттық цифрлық инвестициялық платформа жайлы айтты.
– Ұлттық цифрлық инвестициялық платформа инвестициялық жобаларды кешенді сүйемелдеу бойынша ақпараттық жүйе құруды көздейді. Бұл инвесторларға жан-жақты көмек көрсетуге арналған бірыңғай ақпараттық жүйе. Ол инвестицияларды тарту тиімділігін арттыру және инвестициялық жобаларды іске асыруға мониторинг жүргізу мақсатында құрылған. Жүйеге негізгі мемлекеттік органдар, әкімдіктер және инвестициялық жобаларды іске асыру процесіне тартылған квазимемлекеттік сектор қосылады. Осылайша, платформа процестің әртүрлі жақтарын біріктіретін орталықтандырылған хаб ретінде әрекет етеді. Қазіргі таңда елімізде 756 жоба құрылған. Оның 244-і аяқталса, 147 мың жұмыс орны ашылмақ. Ең бастысы қолға алынған жобаның барлығы да экономикалық тұрғыда пайдалы болуы керек, – деді Ғабидолла Абдуллаұлы.
Облыс басшысы Бейбіт Өксікбайұлы жер жаннаты Жетісу аумағына жүгеріні терең өңдеуге, құс зауытының жұмысын жандандыруға, балық шаруашылығын оңтайландыруға инвестор болса, облыс тарапынан барлық жағдай қарастырылатынын жеткізді. Бұл – облыс экономикасының барлық саласына оң мультипликативтік әсерін тигізетіні анық.
Еңлік КЕНЕБАЙ
