Облыстық мәслихат төрағасы Гүлнар Тойлыбаеваның төрағалығымен облыстық мәслихаттың кезектен тыс ХVII сессиясы өтті.
Күн тәртібінде тұрақты комиссия отырысында қаралып, сессия жиынына енгізілген мәселелер қаралды. Сессияда алдымен Жетісу облыстық мәслихатының өткен жылғы 15 желтоқсандағы № 11-64 «Жетісу облысының 2024-2026 жылдарға арналған облыстық бюджеті туралы» шешіміне өзгерістер енгізу туралы шешім жобасы жайында баяндалды. Осыған байланысты облыстық экономика және бюджеттік жоспарлау басқармасының басшысы Рауан Дауталиновтың баяндамасы тыңдалды. Айтуынша, 2024 жылғы облыстық бюджетке екі сала бойынша өзгерістер енгізілген.
Мәселен, тұрғын үй-коммуналдық шаруашылығы саласы бойынша Көксу, Панфилов, Сарқан аудандарында несиелік тұрғын үй салуға (5 үй, 300 пәтер) 3,2 миллиард теңге бөлінген. Ал отын-энергетика кешені және жер қойнауын пайдалану саласы бойынша Ескелді, Көксу, Қаратал, Кербұлақ аудандары және Талдықорған қаласының жалпы 42 елді мекенінде газ құбыры мен газ тарату желілерінің құрылысын аяқтауға 10,4 миллиард теңге қаражат бөлу туралы ұсыныстар енгізілген.
Сессия отырысында, сондай-ақ, Жетісу облыстық мәслихатының 2022 жылғы 19 тамыздағы «Жетісу облысы жер комиссиясының құрамын және комиссия туралы Ережені бекіту туралы» № 8-20 шешіміне, Жетісу облыстық мәслихатының өткен жылғы 30 наурыздағы «Жетісу облыстық мәслихатының экономика, бюджет, құқықтық тәртіп, сыбайлас жемқорлыққа қарсы күрес, депутаттық өкілеттер мен этика мәселелері бойынша тұрақты комиссияның сан құрамын белгілеу және төрағасы мен мүшелерін сайлау туралы» № 1-3 шешіміне өзгерістер енгізілді.
Айта кетейік, өткен сессияда Жақсылық Қаһарманның депутаттық өкілеттігі тоқтаған болатын, осыған байланысты комиссия мүшесі болып Жүнісхан Ермұхан ұсынылды.
