ҚР Премьер-Министрі Асқар МАМИН Шығыс Қазақстан, Алматы және Қарағанды облыстарына жұмыс сапары аясында «Өскемен – Талдықорған», «Қалбатау – Майқапшағай», «Үшарал – Достық», «Қарағанды – Балқаш – Қапшағай», «Меркі – Бурылбайтал» автожолдары жобаларының іске асырылу барысын тексерді. Бұл туралы ҚР Премьер-Министрінің баспасөз қызметі мәлімдеді.
Ұзындығы 768 шақырым болатын (Шығыс Қазақстан облысының аумағы бойынша – 454 км, Алматы облысының аумағы бойынша – 314 км) «Өскемен – Талдықорған» автожолын салу жобасы бойынша Үкімет басшысына негізгі жұмыстардың аяқталғаны және жыл соңына дейін автомобиль қозғалысының ашылатыны туралы баяндалды.
Ұзындығы 415 шақырымға созылатын «Қалбатау – Майқапшағай» тас жолын реконструкциялау жобасы бойынша 127 шақырым жолда қозғалыс ашылды, жұмыстар 2022 жылы толық аяқтау жоспарланған.
«Үшарал – Достық» автожолы бойынша 180 шақырымнан 145 шақырым жол пайдалануға берілді, жұмыстарды 2022 жылдың бірінші жартыжылдығында толық аяқталады.
Қарағанды облысында Премьер-Министр жалпы ұзындығы 946 шақырым болатын «Қарағанды – Балқаш – Бурылбайтал – Күрті – Қапшағай» автомобиль жолын реконструкциялау барысын тексерді. Биыл төрт жолақты 765 шақырым жолда қозғалыс қамтамасыз етіледі. «Меркі – Бурылбайтал» (262 км) автожолы бойынша қозғалыс толық ашылады.
Өскемен қаласында Үкімет басшысына халықаралық әуежайдың ұшу-қону жолағын реконструкциялаудың аяқталғаны туралы баяндалды. Әуежайдың ұшу-қону жолағының ұзындығы 2800 м дейін, ені 60 м дейін ұлғайтылды. Асфальтбетон жабыны толық ауыстырылды, жарық-сигналдық жабдықтың жаңа жүйесі орнатылды. Сондай-ақ, 30 тонналық жүк терминалының және 100 тонналық уақытша жүк сақтау қоймасының құрылысын аяқтау көзделген.
Премьер-Министрге Үшарал қаласындағы әуежайдың ұшу-қону жолағын реконструкциялау барысы туралы есеп берілді. Жауапты мекеме өкілдері бұл жоба 2022 жылғы 1 мамырда аяқталады деп отыр.
2021 жылы Қазақстанда 8,4 мың шақырым автожолда құрылыс жұмысы жүргізілуде. Оның ішінде республикалық маңызы бар жолдар – 5 мың шақырым, жергілікті желі – 3,4 мың шақырым. Жол-құрылыс жұмыстарына 200 мыңға жуық адам тартылған. Биыл еліміздегі 5,1 мың шақырым жолда жұмыс аяқталады. Қалған құрылыс жұмысы 2022 жылы жүзеге асатын болады.
Жұмыс сапарына Шығыс Қазақстан облысының әкімі Даниал Ахметов, Алматы облысының әкімі Амандық Баталов, Қарағанды облысының әкімі Жеңіс Қасымбек, Индустрия және инфрақұрылымдық даму вице-министрі Берік Қамалиев, «ҚазАвтоЖол» ҰК» АҚ басқарма төрағасы Асқар Мұратұлы және басқа да жауапты тұлғалар қатысты.
«ЖЕТІСУ-АҚПАРАТ»
