Жылдар бойы жинақталған тәжірибе туған өлкені дамытуға арналса, өңір экономикасы үшін жаңа өсу нүктесі болмақ.
Кәсіпкер Рүстем Сақабаев дәл осы жолды таңдады. Біраз жыл Алматы облысында табысты еңбек етіп, кейіннен кәсіпорнын Жетісу облысына көшірді. Бүгінде «Дәмді жем» ЖШС майбұршақты қайта өңдеп, жем өндіруге маманданған. Кәсіпорын жұмысын 2018 жылы Байсерке ауылында бастады. Осы уақыт ішінде серіктестік біраз тәжірибе жинап, технологиялық үдерістерді жолға қойып, оны дамытуға негіз қалыптастырды.
Өндіріс орны биыл Көксу ауданына қоныс аударды. Рүстем Сақабаев үшін бұл шешім кәсіпті жандандырудағы кезекті қадам еді. Осылайша туған өлке экономикасына үлес қосуды ойлаған өңір тумасы үшін бұл жаңа мүмкіндік болды. Бүгінде компания майбұршақты қайта өңдеп, жаңа бағыттарды меңгеруде. Алдағы жоспарларының қатарында – өндіріс қуатын арттыру және мал шаруашылығы мен құс шаруашылығына арналған кешенді жемдерді шығаруды іске қосу бар.
Жобаны жүзеге асыру өнім түрлерін көбейтіп, бәсекеге қабілеттілікті арттыруға және ауыл шаруашылығы өндірушілерінің жем базасын нығайтуға жол ашады. Кәсіпкер облыстық кәсіпкерлер палатасына жүгініп, кеңес те алды. Нәтижесінде оған ауыл шаруашылығы бизнесін дамытудың тиімді құралдарының бірі ретінде өндірістік кооператив құру туралы ұсыныс берілді.
– Кооперация ауыл шаруашылығы тауарларын өндірушілерінің күшін біріктіріп, нарық қатысушылары арасында өзара іс-қимыл жүйесін құруға, тұрақты шикізат базасын қамтамасыз етуге және өндіріс тиімділігін арттыруға мүмкіндік береді, – дейді облыстық кәсіпкерлер палатасының шағын кәсіпкерлікті дамыту бөлімінің басшысы Бекмұрат Мұсахан.
Осы тетіктің артықшылықтарын зерделеп, мемлекеттік қолдау шараларымен танысқан Рүстем Сақабаев ауыл шаруашылығы өндірістік кооперативін құру туралы шешім қабылдады. Қазіргі уақытта кәсіпкерлер палатасының сүйемелдеуімен қажетті құжаттар дайындауда.
Облыстық кәсіпкерлер палатасының директоры Дәурен Оңалбаевтың айтуынша, кооперативтер құру ауылдық кәсіпкерлік пен өңірдің қайта өңдеу саласы үшін қосымша мүмкіндіктер ашады. Қазір негізгі міндет – ауыл шаруашылығы өнімдерін қайта өңдеуді дамыту және тұрақты өндірістік тізбектер құру. ӘКК құру бастамасы осы міндеттерге толық сәйкес келеді. Кооперация өндірушілердің ресурстарын біріктіруге, жұмыс тиімділігін арттыруға және мемлекеттік қолдау шараларына қолжетімділікті кеңейтуге ықпал етеді. Палата кәсіпкерлерге осындай жобаларды іске асырудың барлық кезеңіне қажетті сүйемелдеу көрсетуге дайын.
Айгүл БАЙБОСЫНОВА
