Жыл басынан аудан экономикасына 4 млрд. теңгеден аса инвестиция тартылды. Мұндағы ірі инвестициялық жоба цемент өндіру зауыты. «Алацем» зауытының 47 млрд. теңгені құрайтын жобасы 583 адамға жұмыс орнын ашып, жылына 3,9 млрд.теңгеден аса салық аударымын жасайды. Аталған кәсіпорында негізінен жергілікті тұрғындар еңбек етеді.
Инвестициялық жобаны табысты іске асыру ауданға оң серпін береді. «Көксай Мұзбел» – бұл аудан аумағында орналасқан мыс кен орны. Аталған кен орны «Қазақмыс» корпорациясы» ЖШС-мен бірге «Шоғырландырылған тау-кен құрылыс компаниясы» ЖШС-нің еншілесінде. «Шоғырландырылған тау-кен құрылыс компаниясы» ЖШС қуаттылығы жылына 50 млн. тонна кен өңдеп, 860 мың тонна мыс концентратын, 5 мың тонна мыс катодын шығарады. Жоба құны 1 трлн. 300 млрд. теңге.
Өңірдегі кен байыту комбинаты іске қосылса, 3 300 адамға жаңа жұмыс орны ашылады. Бұл комбинат 2027 жылдың 1 тоқсанында іске қосылады деп жоспарланып отыр. Қазіргі кезде кен орнының қорын анықтау үшін геологиялық барлау жұмысы жүргізілуде. Сонымен бірге нысан құрылысының техникалық- экономикалық тұжырымдамасы және кеннің бетін аршу жұмысын орындау үшін меншікке құқық беретін құжаттары әзірленуде.
Алдын ала болжам бойынша аталған кәсіпорыннан республикалық және жергілікті бюджеттерге жылына түсетін салық мөлшері 35-45 млрд. теңгені құрайды. Кен орнының ауқымдылығы мен жоспарланған өндіріс көлемін ескерсек, жоба ауданның әлеуметтік-экономикалық дамуына айрықша үлес қоспақ. Сондай-ақ, «Шоғырландырылған тау-кен құрылыс компаниясы» ЖШС 2022 жылдың желтоқсан айында Сарыөзек ауылы аумағында орналасқан теміржол тұйығын сатып алды. Аталған жобаға 3,5 млрд. теңге тартылады.
Нысанда «Көксай Мұзбел» кен орнына қажетті инфрақұрылымды құруға арналған материалдық сақтау, жүктер, көлік құралдары, жабдықтар мен құрылыс бұйымдары жинақталатын қойма құрылысы биылғы наурыз айында аяқталып, іске қосылды. Нысан құрылысына 100-ден аса жұмысшы, оның ішінде ауданның 15 тұрғыны жұмылдырылды.
«Жетісу Терминал» ЖШС сыйымдылығы 15 теміржол вагонын құрайтын терминал салу жұмысын жүргізуде. Жоба биыл жүзеге асады. Инвестиция 3 млрд. теңгені құрап, 50 адамға жаңа жұмыс орны ашылады. «Golden Steppe» ЖШС жылына 150 мың тонна кен өндіретін Арқарлы кен орнында алтын-күміс қорытпасын шығаратын алтын байыту фабрикасын салуды жоспарлауда. Фабрика салу 2027 жылы іске асады деп күтіліп отыр. Қазіргі кезде кен орнының қорын анықтау үшін геологиялық барлау жұмысы жалғасуда. Жоба құны 6,1 млрд. теңге. Болжамды салық төлемдері жылына 640 млн. теңгені құрайды. Бұл орын іске қосылса 55 адамға жұмыс орны құрылады.
Энергетика саласына келетін болсақ, «ALACEM ENERGY» ЖШС-нің 110 киловольттық, ұзындығы 14 шақырымды құрайтын әуе электр желілерінің құрылыс жобасы іске асырылуда. 1 млрд. теңге инвестиция тартылып, 20 адам жұмыспен қамтылған.
Көктал өзені бойындағы «Жарық Энерго» ЖШС-нің гидроэлектрстансысы 3 каскадтан тұрады. Жалпы қуаттылығы 37 мегаватт, сметалық құны 27 млрд. теңге. Бұл жоба 2021-2026 жылдары жүзеге аспақ.
Аталған серіктестіктің ГЭС-1.1 су электр стансысының құрылыс-монтаж жұмыстары басталған. 1-ші каскадының жалпы қуаттылығы 8,6 мегаватты құрайды, инвестиция сомасы 3 млрд. 500 млн. теңге. Жоба биылғы 4 тоқсанда жүзеге асады. 2022 жылы серіктестік негізгі капиталға 1 млрд. 325 млн. теңге, 2023 жылы 1 млрд. теңгенің инвестициясын тартты. Жоба іске қосылған уақытта 20 адам тұрақты жұмыспен қамтылады. Қазіргі уақытта 120 адам еңбек етуде.
Айгүл БАЙБОСЫНОВА
