Бүгінде мемлекет тарапынан кәсіпкерлікті дамыту, кәсіпкерлерді қолдау үшін түрлі бағдарламалар жасап, аяққа тұруға қол ұшын созып жатыр. Тетігін тауып, әрекет еткендердің бүгінде жұмысы өрге жүріп, жемісін беріп келеді.
Мысалы, мемлекет тарапынан шағын және орта кәсіпкерлерді қолдау мақсатында жаңа нысандарды салуға немесе кеңейтуге «Біріңғай кешенді бағдарламасы» арқылы қаржылай көмек көрсетілуде. Бұл бағдарлама аясында 45 жобаға 2 млрд 630 млн теңге көлемінде қолдау көрсетілді.
«Ауыл аманаты» бағдарламасы аясында бүгінде 49 өтінім қаралып, оның ішінде 43 өтінім мақұлданды. Жоба нәтижесінде 45 жұмыс орны ашылып, жалпы құны 334,5 млн теңгені құрайтын жобалар іске асырылды.
«Ауыл аманаты» бағдарламасының жарқын мысалдарының бірі – Байбазаров Ерболдың жобасы. Е.Байбазаров осы бағдарлама аясында 2,5 пайызбен жеңілдетілген қаржы алып, бал шаруашылығымен, яғни омарта қойып, ара өсірумен айналысуда.
Е.Байбазаров бұл салаға келмес бұрын 4-5 жыл ара өсірудің қыр-сырын үйренген. Осы уақыт аралығында ол араларды күту, бал жинау технологиялары, сондай-ақ омарта жабдықтарын дұрыс пайдалану бойынша білімін жетілдірген. Оның басты мақсаты – табиғи әрі сапалы бал өндіру арқылы ауыл шаруашылығына өз үлесін қосу. Айта кету керек, бал араларын да тұрғылықты табиғатқа үйренген жергілікті омарташылардан алған.
Қазіргі таңда Ербол Көкжар ауылында, өз тұрғылықты жерінде, 42 омарта қойып, кәсібін дамытып келеді. Оның өндіріп отырған балы алуан шөптерден жиналады. Бұл балдың да денсаулыққа пайдасы шаш етектен екенін де айта кеткеніміз жөн.
Ерболдың бұл кәсіпті бастауына «Ауыл аманаты» бағдарламасы үлкен көмек көрсетті. Бағдарлама аясында алынған қаржы оған қажетті жабдықтар мен омарта құралдарын сатып алуға мүмкіндік берді. Мемлекет тарапынан көрсетілген қолдау жас кәсіпкердің ісін оңтайлы бастауына септігін тигізді.
«Ауыл аманаты» бағдарламасы – ауыл тұрғындарына үлкен мүмкіндіктер ұсынатын тиімді жоба. Байбазаров Ерболдың табысты кәсіпкерлік тәжірибесі бұл бағдарламаның ауыл шаруашылығын дамытудағы және жаңа жұмыс орындарын ашудағы маңызын көрсетеді. Мемлекеттік қолдаудың арқасында ауыл кәсіпкерлері өз армандарын жүзеге асырып, ел экономикасына елеулі үлес қосуға мүмкіндігі бар.
АБЗАЛ СҮЛЕЙМЕН
Фото: ksh.volgograd.ru
