Жыл бойы тынымсыз еңбек еткен шаруалардың қамбасы дәнге толып, көңілі жай болды. Биылғы ауа райының қолайлылығы, оның үстіне, облыс әкімдігінің ауылшаруашылығы еңбеккерлеріне көрсеткен көмегінің нәтижесінде мол ырысқа кенелді. Келер жылы осы жетістігін төмендетіп алмауды ойлаған диқандар күздің басынан дала жұмыстарына белсене кірісті.
Облыстық ауылшаруашылығы басқармасының 18 қараша күнгі ақпараты бойынша, аймақта 69120 гектар жерге күзгі дақыл егуді жоспарлаған. Оның ішінде 68920 гектар бидай, 200 гектар арпа себілуі керек. Бұл өткен жылмен салыстырғанда 100 гектарға артық. Қазір бұл бағыттағы жұмыс толығымен орындалды. Ал сүдігер жырту бойынша 127000 гектар жер жыртылуы керек еді. Соның ішінде 15000 гектар терең сүдігер жырту, 3209 гектар тыңайтқыш енгізу жұмысы да бар. Бүгінде 122590 гектар сүдігер жыртылған. Бұл бағыттағы жұмыс 96,5 гектарға орындалып тұр.
Сүдігер жырту бойынша аудандардағы жағдайда тұрақты. Ескелді, Кербұлақ, Сарқан аудандары мен Талдықорған қаласы сүдігер жырту жұмысын 100 пайыз толық орындап тастады. Ал Ақсу, Көксу, Алакөл, Қаратал аудандарының жағдайы да қанағаттанарлық деуге болады.
Алакөл ауданының егіншілері биыл 7600 гектар күздік бидай, 9147 гектар жаздық бидай, 24023 гектар жаздық арпа, 200 гектар сұлы, 897 гектар дәндік жүгері, 16700 гектар майбұршақ, 4341 гектар күнбағыс, 542 гектар қант қызылшасын жинап, мол өнімге кенелді. Келесі жылы да осындай жетістікке жету үшін 7600 гектарға күздік дақыл егу жоспарын орындап, 13500 гектар сүдігер жырту жұмысының 80 пайызын бітірді.
Күздің айы бітіп, қылышын сүйреп қыс келгенше әлі біраз уақыт барын ескерсек, бірқатар аудандағы сүдігер жырту жоспары толық орындалатынына сенім мол.
Қажет АНДАС
