Тіл сарайында ветеринария саласы қызметкерлеріне құрмет көрсетілді. Мерекелік шарада бір топ маман марапатталып, еңбектері бағаланды.
Салтанатты жиында облыстық ветеринария басқармасының басшысы Нұрлан Жамаубаев қызметкерлерді кәсіби мерекелерімен құттықтап, атқарылып жатқан жұмыстарды баяндады.
Жиында айтылғанай, облыста ауыл шаруа- шылығы жануарларын бірдейлендірудің ақпараттық базасында барлығы 2 822 219 бас мал тіркелген. Оның ішінде 581 272 бас ірі қара, 2 088 070 бас ұсақ мал, 222 421 жылқы, 16 843 шошқа және 2 948 түйе бар. Бүгінде ауыл шаруашылығы жануарлары мен құстардың аса қауіпті 14 түрлі жұқпалы ауруына қарсы профилактикалық іс-шаралар аясында мыңдаған вакцина егіліп, індеттің алдын алу жұмыстары жүргізілуде.
Егер 2023 жылы аймақта аса қауіпті аурулардың 15 ошағы тіркелсе, ветеринар мамандардың жүйелі профилактикалық жұмыстарының нәтижесінде олардың саны жыл сайын азайып келеді. Облыс құрылғаннан бері ветеринария қызметінің материалдық-техникалық базасын нығайтуға бюджеттен 2 млрд. 655 млн. теңге бөлінді. Биыл жалпы сипаттағы трансферттер аясында саланы дамытуға 1 млрд. 97 млн. теңге қарастырылды. Оның 845 млн. теңгесі – жалпы сипаттағы трансферттер, ал 252 млн. теңгесі – жергілікті бюджет қаражаты.
Осы қаражат есебінен 83 блокты-модульдік ветеринариялық пункт пен 5 ветеринариялық стансы салынды. Сонымен бірге 83 қызметтік автокөлік сатып алынды. Республика бойынша алғаш рет дәл Жетісу облысы үшін вакциналарды тасымалдауға арналған құны 35 млн. теңге болатын арнайы рефрижератор, сондай-ақ жануарлардың өлекселерін залалсыздандыруға арналған жалпы құны 167 млн. теңге болатын екі жылжымалы қондырғы сатып алынды. Ветеринария қызметін заманауи құрал-жабдықтармен қамтамасыз ету мақсатында 308 млн. теңге бөлініп, оған 100 тоңазытқыш, 56 кір жуғыш машина, 55 кондиционер, 238 планшет, 199 компьютер және өзге де қажетті жабдықтар сатып алынды.
Бұдан бөлек, ветеринария саласы мамандарының жалақысы да ұлғайтылды.
Салтанатты жиында салаға жауапты басқа да мамандар сөз сөйлеп, жылы лебіз білдірді. Сондай-ақ ветеринария қызметі қазіргі заман талабына сай болмаса, ауыл шаруашылығы өнімдерін арттыру мүмкін емес, сол себепті бұл істе жүйелі жұмыс атқарылуы тиіс, осы ретте облыс әкімдігі тарапынан аталған салаға жоғары деңгейде көңіл бөлініп келе жатқаны да тілге тиек етілді.
Мерекелік басқосуда өз қызметінде жоғары нәтижелерге қол жеткізген бір топ маман иесі ҚР Ауыл шаруашылығы министрлігінің, облыс әкімдігінің және облыстық ветеринария басқармасының Құрмет грамоталары және Алғыс хаттарымен марапатталды. Ветеринария саласының дамуына елеулі үлес қосқан ардагерлерге де сый-құрмет көрсетіліп, «Ветеринарияның құрметті ардагері» төсбелгісі табыс етілді. Өз ісіне адалдық танытып, көп жылдық қажырлы ісімен ерекшеленген мамандардың да еңбегі еленіп, «Еңбек адамы» медалі берілді.
Шара барысында ветеринариялық пункттері бар Ақсу, Алакөл, Қаратал, Кербұлақ, Панфилов, ветеринарлық стансысы мемлекеттік коммунальдық кәсіпорындарының қызметкерлеріне «НИВА» автокөліктерінің кілттері табысталды.
Айгүл БАЙБОСЫН
