Қазан айының алғашқы аптасынан алқаптарына орақ салған жаркенттік жүгерішілер далалық науқанды қарашаның басында белуардан асырып, қырмандарын «дала аруының» қызыл дәніне толтырды.
алпы есеппен әр гектардан 70 центнерден дән жиналуда. Округтерге қарасты ауылдардың қырмандарына 163149 тоннадан аса жүгері әкелініп, жергілікті тұрғындардың қатысуымен сұрыптау, кептіру жұмыстары жүргізілуде. Қырмандарға 800 тонна жүгері дәні, 19749 тонна собығымен тасып әкелініп, соның 109800 тоннасы сатылды. Оның 87 мың тоннасы Жаркент крахмал-сірне зауытына, 22800 тоннасы жем тартатын кәсіпорындарға өткізілді. Әзірге 32800 тонна дән мен собықты жүгері шаруалардың өз қоймаларында мал азығына қалдырылды. Бұл көрсеткіш науқан толық аяқталғанға дейін тағы өсуі мүмкін.
Жаркент өңірінде қараша айының екінші жартысына дейін жалпы өсірілген 23400 гектар жүгері алқабының 23290 гектары орылып болды. Қалған 100 гектардан аса алқаптағы «дала аруының» дәні ай соңына дейін тұтас жиналмақ. Өңірдегі жүгері жинау науқаны Көктал, Пенжім, Бірлік, Шолақай, Үлкеншыған ауылдық округтерінде қарқынды жүргізілді. «Көктал Агро» ЖШС мен «Оразбай Б.З.», «Айкерім», «Ернар» жеке шаруа қожалықтары егістігін тамшылатып суару арқылы гектар өнімділігін арттырды.
Биыл жүгерінің «Марко», «Пионер» және «Тұлпар» сұрыптарын жалпы 6620 гектар жерге өсірген Пенжім ауылдық округінің диқандары қазір астық жинауды барынша жедел атқаруда. Округтегі «Беширов», «Райысов», «Бейсебеков», «Қожамбердиев» ЖШҚ жүгері алқаптарындағы ору жұмысын аяқтап, бірнеше комбайн тасымалдаушы жүк көлігі мен тіркемелі трактор кезектегі қожалықтардың жүгерісін орып, жинауға атсалысуда.Техникалардың күндіз-түні тоқтаусыз жұмыс атқаруына бар жағдай жасалған.
Мырзағали НҰРСЕЙІТ
Панфилов ауданы
