Алмалы ауылындағы «Бекішов» шаруа қожалығы ауылшаруашылығымен бірге мал өсіру ісін жандандыруда. Оған Ерлан Бекішов жетекшілік етеді.
Біз майбұршақ алқабындағы қызу тірліктің куәсі болдық. Комбайндар майбұршақ дақылын шауып, «КамАЗ» көлігіне тиеуде. 1997 жылы құрылған шаруашылық иелігіндегі 240 гектарға арпа-бидай, 150 гектарға балтамыр, 30 гектарға қытай бұршағын егіпті.
Алқаптағы жұмыспен Ерлан Төлеубайұлы таныстырды. Шаруашылық басшысы көктемгі науқан кезінде 15, маусым кезінде қосымша 5 адам еңбекке тартылатынын мәлім етті.
– Биыл өнім жақсы. Қант қызылшасының әр гектарынан 8 центнерден жиналды. Қытай бұршағының да шығымы ойдағыдай. Тек дайын өнімді өткізу бағасы көңілдегідей емес. Себебі, баға тұрақсыз. Бастапқыда Алматы қаласындағы «Вита соя» АҚ-ға өткізілді. Ал қазір Көксу ауданындағы «Уыз Май Индастри» ЖШС-ге жөнелтудеміз, – дейді Ерлан Төлеубайұлы.
Шаруашылық жұмысына қажет техникалар толық. Сонымен бірге, «Монопил» тұқым сепкіші алынған. Аудан әкімдігінің ауыл шаруашылығы мен жер қатынастары бөлімі басшысының орынбасары Айгүл Абдраимованың берген мәліметіне жүгінсек, биыл 19 974 гектар алқапқа майлы дақыл себіліп, оның 14 873 гектары жиналған. Орташа өнімділігі гектарына 16,8 центнерден айналып, жалпы түсім 24 973 тоннаны құраған. Оның ішінде қытай бұршағы, мақсары, күнбағыс бар. Бүгінде бұл бағыттағы жұмыс қарқын алуда.
Жақсылық ЖОМАРТҰЛЫ
