Жетісулықтар биыл қант қызылшасынан мол өнім алды. Оны «Көксу қант» зауытының айналасындағы қызу тірлік бір дәлелдесе, егіс алқаптарындағы жанталас жұмыс нақтылай түседі. Көксу ауданының Мұқыры ауылына қарасты «Жалайыр» шаруа қожалығының қызылшашыларымен кездескенде осы ойымызға көз жеткізе түстік.
– Биыл аудандағы 172 шаруа қожалығы 2337 гектар қант қызылшасын екті. Қыркүйек айының 15 жұлдызынан бастап өнім жинап, қант зауытына өткізу жұмысы басталды. Міне, содан бері күзгі науқандық жұмыс бір тынған жоқ. Бүгінгі күнде аудан қызылшашылары «Көксу қант» зауытына 89 мың тонна, «Ақсу қант» зауытына 9 мың тонна өнім өткізді. Қазылып, арнайы жерге жиналған 33 мың тонна қант қызылшасын зауытқа тасу жұмысы жүргізілуде. Науқандық жұмыстың соңына жетіп қалдық. Енді 16 шаруа қожалығының 92 гектар жерге себілген қант қызылшасын жинап бітсек, ойлаған жоспар толығымен аяқталады. Ауданда қант қызылшасын жинайтын 31 комбайн бар, оның 20-сы тіркемелі, қалғаны өздігінен жүріп, қазып, тиейтін техника. Техника жағынан қиындық жоқ. Алдағы бір апта көлемінде жұмыс толығымен аяқталады. Қазіргі есеп бойынша гектар түсімі 560-600 тонна айналасында болып тұр, – дейді Көксу аудандық ауылшаруашылығы және жер қатынастары бөлімінің басшысы Данияр Белижанов.
Биылға қант қызылшасы өнімінің мол болуына облыстық әкімдік тарапынан көрсетілген көмекті ерекше атап айтуға болады. Әсіресе, лизингпен техника сатып алған шаруашылықтардың қатары арта түскен. Соның бірі «Жалайыр» шаруа қожалығы. Қуатты техниканың арқасында өздеріне тиесілі 23 гектар жердің қызылшасын жинап, зауытқа өткізіп үлгерген шаруашылық енді басқа шаруа қожалықтарының жұмысына көмектесіп жүр.
– Шаруашылығымыз құрылғалы 10 жылдан асты. Қазір 200 гектардан астам суармалы жеріміз бар. 2018 жылдан бастап лизингпен техника алып, шаруашылық жұмысын кемелдендіре түстік. Қолымызда егін шаруашылығына қолданылатын барлық техника толық. Биыл 72 млн. теңгеге қант қызылшасын жинайтын 1 комбайн, жер жыртатын 1 трактор және соқа алдық. Лизингпен техника алу шаруашылыққа өте тиімді. Оның 50 пайызы үкімет тарапынан субсидияланады. Келесі жылы 50 гектар жерге қант қызылшасын себуді жоспарлап отырмыз. Сондықтан алдағы уақытта да лизингпен керекті техника сатып алуды ойластырып жүрмін, – дейді «Жалайыр» шаруа қожалығының жетекшісі Мақсат Абдырахманов.
Қант қызылшасының егіс алқабы артып, өнім көлемі артқан сайын ауыл тұрғындарына да жұмыс көбейген. Көктемгі егіс жұмысынан бастап күзгі егін жинау науқаны аяқталғанға дейін егіс басынан нәпақасын айыратын диқандар қатары көбейген.
– 2000 жылдан бері ауылшаруашылығы жұмысына атсалысып нәпақа тауып келеміз. Биыл ауылдастардың дені қант қызылшасына жұмыс істеп жүр. Ауылдас әйелдер бірігіп, топ құрғанбыз. Комбайнның артында қалған масақтарды жинап, күніне 7-8 мың теңге қаржы табамыз. Жұмыс таңғы 9-дан кеш батқанша жалғасады, – дейді Мұқыры ауылының тұрғыны Рысқан Жабықбаева.
Рысқанның тобындағы барлық жұмыскердің де көңілі көтеріңкі. Үйреншікті жұмыс оларды жалықтырмайды. Қайта алдағы күндерге деген сенімін үкілеп, ұмтылдыра түседі.
Қажет АНДАС
