Жетісу облысы – географиялық тұрғыдан тиімді орналасқан, транзиттік әлеуеті зор. Қарқынды дамып келе жатқан экономикалық өсу нүктелері – Қорғас пен Достық. Оларды дамыту мақсатында инвестициялар тарту, жүк ағыны мен транзитті ұлғайту, өткізу пункттерін жаңғырту жөнінде шаралар қабылдануда. Атап айтқанда, Қорғас торабындағы Нұр жолы өткізу пунктінде тәулік бойы жұмыс режимі мен электрондық кезек жүйесі енгізілді, соның нәтижесінде өткізу қабілеті екі есеге артты, бұрын тәулігіне 800 көлік өтсе, қазір 1600 көлікке дейін өтеді.
Сонымен қатар, ірі габаритті жүктерді тасымалдау үшін айналма жол салу қарастырылуда. Нәтижесінде жүктеме азайып, өткізу қабілеті арта түсетін болады. Алтынкөл станциясында жаңғырту жұмыстары, жаңа экспорттық парк құрылысы, Алтынкөл-Жетіген учаскесінде екінші жол салу жоспарланған. Жобаларды іске асыру, станцияның өткізу қабілетін тәулігіне 18-ден 30 пойызға дейін арттыруға мүмкіндік береді. Бұдан бөлек, «Қорғас-Шығыс қақпасы» арнайы экономикалық аймағында орналасқан құрғақ портты кеңейту жұмыстары басталды, онда қосымша 10 жол салынады, бұл терминалдың қуатын бір жарым есеге арттырмақ. Оған қоса, экономикалық аймақта жүк-жолаушылар әуежайын салу жоспарланған. Бұл Қазақстан-Германия бірлескен жобасын «SKYHANSA» компаниясы жүзеге асыратын болады. Инвестициялық жобаның жалпы құны
250 млрд. теңге. Әуежай 2027 жылы іске қосылып, 700 тұрақты жұмыс орны құрылатын болады.
