Премьер-министрдің орынбасары Серік Жұманғарин Ресейге салынған соңғы санкциялар Қазақстанның астық экспортына кері әсер ете ме деп алаңдайтынын айтты.
«Шын мәнінде бұл бізді өте қатты жанап өтіп жатыр. Мұның кесірінен көптеген логистикалық, сауда тізбектері үзіліп қалды. Біз санкция салушы коалицияның мүшесі емеспіз және осы біржақты санкциялық саясатты қолдамаймыз. Бірақ ол санкцияны сақтаймыз. Өйткені ол бізге экономикалық тұрғыдан тиімді. Біздің экономикамыз соншалық үлкен емес. Сәйкесінше санкция түссе, қысымын көтере алмаймыз. Біздің кәсіпорындар бірінші кезекте көтере алмайды. Сондықтан біз үнемі диалог құрып келеміз. АҚШ-пен, Еуропалық одақпен жұмыс істейтін өкілдіктер бар. Мен осы жұмысты Қазақстанның ішінде вице-премьер ретінде басқарамын», — деді ол Мәжілістің жалпы отырысынан кейін БАҚ өкілдеріне берген сұхбатында.
Вице-премьер Ресей астығына қойылған шектеулердің Қазақстанға әсері зерделеніп жатқанын айтады.
«Санкция саясаты әсер ететін салалар соңғы қабылданған пакеттерде көрініс тапқан. Айтарлықтай алуан түрлі деуге болады. Әзірге ол санкциялар нақты азық-түлік өнімдерін қамтыған жоқ. Бірақ Еуроодақ Ресей мен Беларус бидайына экспорт бажын салғанын білесіздер. Бұл айтарлықтай салмақты аргумент. Яғни, осы шектеулер қандай да бір жолмен бізді де жанап кетпей ме, соны анықтап алу қажет. Өйткені біз Еуроодаққа айтарлықтай көп бидай экспорттаймыз», — деді Серік Жұманғарин.
