Ұлы Жібек жолының қазақ жеріндегі көне сүрлеуі біздің дәуірімізде жаңаша түр-сипатпен жаңғыруда. Халықаралық қарым-қатынасқа жол ашуымен ерекшеленіп, ежелден батыс пен шығысты жалғастырған бұл соқпақтың бойы бүгінде ғасыр құрылысы дерлік ірі индустриялық-инновациялық жобаларды жүзеге асыру алаңына айналды.
Соның бір көрінісі – сенбіде Қазақстандағы шет ел елшілері дипломатикалық корпусының «Қорғас – Шығыс қақпасы» арнайы экономикалық аймағымен танысуға келуі. ҚР Сыртқы істер министрі Қайрат Абдрахманов бастап келген бұл топ Алматыдан Алтынкөлге пойызбен жетіп, бірден арнайы автобустармен «Құрғақ портқа» ат басын тіреді. Қазақстандағы шет ел дипломаттары мен әлемнің атағы айғақ ақпарат құралдарының тілшілері мұнда осымен екінші мәрте бас қосып, Қорғастағы қарымды қарекеттермен танысуда.
Бұл басқосуда алдымен облыс әкімі Амандық Баталов мінберге көтеріліп, 25 шетел атынан келген 40-тан астам құрметті қонаққа аймақ жұртының айдарлы істерін таныстырды. Облыс басшысы кеше ғана Астанада өзі қатысып отырған Елбасының кезекті дәстүрлі Жолдауынан туындайтын міндеттерді талдаудан әңгіме өрбітіп, Президент бастамасымен жүзеге асқан «Батыс Еуропа – Батыс Қытай» автодәлізінің өлкеге, барша қазақстандықтарға әкелген игіліктерін жеткізді.
Облыс әкімінен кейін мінберге шыққан ҚР Сыртқы істер министрі Қайрат Абдрахманов қазақ, орыс және ағылшын тілдерінде көсіле сөйлеп, Қытайдан бастау алатын бұл жолдың Батыс Еуропаға дейінгі Орта Азия, Турция және Парсы шығанағы елдері арқылы өтіп, әлемдік сауда байланысын қамтитынын тілге тиек етті. 2015 жылы 29 маусымда жұмысын бастаған «Құрғақ порт» арқылы үстіміздегі жылдың 30 қыркүйегіне дейін 235225 контейнер жан-жаққа жөнелтілген. Алғашқы күннен бастап «Құрғақ порт» күн сайын 5-6 жүк пойызын қабылдап келсе, жаңа қуатты техникалар мен жабдықтарды іске қосудың нәтижесінде биылдан бастап бұл көрсеткіш 10-12-ге дейін өспек. Министр «Қорғас – Шығыс қақпасы» арнайы экономикалық аймағының әлемдік сауда байланысы мен халықаралық қарым-қатынасқа қолайлы әлеуеті жайлы сөйледі. Тіпті, шетелдік қонақтарға өзінің осы жерден 20 шақырым қашықтықтағы Жаркент қаласында өмірге келгенін де мақтанышпен жеткізді.
Құрметті қонақтарға бұдан соң «Құрғақ порт» жұмысы мен оның аумағында салынып жатқан халықаралық астық, цемент зауыттары секілді нысандардың құрылысы бейнефильм, плакаттар арқылы таныстырылып, пойыздарға жүк тиеу жұмыстары көрсетілді.
Түс ауа меймандар «Қорғас шекара маңы халықаралық ынтымақтастығы орталығының» қызметімен танысты. Орталықтың қазақстандық бөлігіндегі «Самұрық» сауда үйін аралап көрді. Сапар барысында сан тілде өзара қызу сұхбат жүргізілген бұл басқосудың әлемнің әр тарабына жалаулы жаңалық әкеткенін байқау қиын емес. Бұл ақпараттардың халықаралық сауда мен қарым-қатынасқа, салиқалы саяхатқа дем беретіні де даусыз.
Мырзағали НҰРСЕЙІТ
Панфилов ауданы
