Талдықорғандық көп балалы ана Жанар Тұрғанбаева сүттен ірімшік жасаумен айналысады. Ол таяуда «Бір ауыл – бір өнім» жобасына қатысып, өнімдерін ұсынды.
Жеке кәсіпкер өнімдерін алғаш рет 3 жыл бұрын жасаған. Сөйтіп, ол ісін алға жылжытып, қолдау алу үшін «Атамекен» өңірлік кәсіпкерлер палатасына жүгініп, кеңес алды. Нәтижесінде «Жетісу-баракат» жеке кәсіпкерлігін ашып, бүгінде оның сүт өнімдері сәтті тұтынылуда. Жанар кәсіпкерлер палатасының қолдауымен 200 АЕК көлемінде грантқа қол жеткізіп, оған өнім өндіруге қажет заттар сатып алады. Кәсіпкердің ірімшігі жергілікті шикізаттан дайындалады. Сол себепті табиғи өнімдерінің сапасы жоғары саналады. Әзірлену сәтінде оның ерекшелігі мен дәміне мұқият көңіл бөлінеді.
Табиғи сүттен жасалған өнімде адам ағзасына қажет пайдалы заттар сапасын жоғалтпастан сақталады. Кәсіпкер келіншектің айтуынша, ол бастапқыда ірімшікті үй жағдайында әзірлеген. Оны тек туыстары мен достары тұтынған. Кейіннен «Бір ауыл – бір өнім» жобасына қатысып, жәрмеңкеде тауарлары жоғары деңгейде өткен. Енді Жанар сүттен жасалған сүзбе, кілегей, ірімшік, құрт, қатық сияқты өнім түрлерін сауда нүктелері арқылы сатуды ойлап отыр.
– Көктемде кеңес алу үшін кәсіпкерлер палатасына жүгіндім. «Бір ауыл – бір өнім» жобасына қатысып, жартылай финалға шықтым. Бұл менің ірімшік жасаудағы, бизнесімді дамытудағы алғашқы үлкен қадамым болды. Содан бері өнімдеріме деген сұраныс артты. Кәсіпкерлер палатасы маған барлық жағынан қолдау көрсетуде, – дейді өз ризашылығын білдірген Жанар Тұрғанбаева.
Алдағы уақытта кәсіпкер өндірісін кеңейтуді жоспарлауда. Шағын цех ашып, өнімдерін жергілікті дүкендер мен супермаркеттер арқылы өткізуді ойға алып отыр. Облыстық кәсіпкерлер палатасының директоры Дәурен Оңалбаевтың сөзінше, Жетісу аймағында әйелдер түрлі салада еңбек етеді. Олар бизнесті белсенді жүргізіп, экономиканың дамуына үлес қосып келеді. Кәсіпкерлер палатасы жергілікті кәсіпкерлерге қолдау көрсетуді жалғастыруда.
Айгүл Байжұмақызы
Талдықорған қаласы
