Текелі қаласында сүт зауыты 70 жылдан аса уақыт тоқтаусыз жұмыс істеп келеді. Оның өнімдері әрбір жергілікті тұрғынға балалық шақтан таныс.
Зауыттың басты артықшылығы – жергілікті шикізатты пайдаланады. Бұл ауыл шаруашылығымен айналысатын шаруаларға тұрақты табыс көзі және өндіріс көлемін арттыруына мол мүмкіндік. Бүгінде кәсіпорында айран, құрт, сүт, қаймақ, сүзбе, йогурт, сары май, кілегей сияқты экологиялық таза 23 түрлі сүт өнімдері шығарылады. Өндіріс барысында санитарлық талаптар қатаң сақталып, өнім сапасы тұрақты бақылаудан өтеді. Мемлекеттік субсидиялардың арқасында зауыт өнімдерінің өзіндік құны жоғары болса да табиғи өнім қолжетімді болуы үшін орташа бағаны ұстап отыр.
Кәсіпорын республикалық «Алтын сапа» байқауының жүлдегері. Ауызбірлігі мықты ұжымда қазақ, орыс, корей, татар сияқты әртүрлі ұлт өкілдерінен құралған 75 адам еңбек етеді. Зауыт тарихы сонау 1953 жылдан бастау алған. Алғашқы кезде жұмыстың бәрі сүт қабылдайтын шағын пункттен басталған. Кәсіпорын тіпті күрделі 90-жылдардың өтпелі кезеңінде де өз істерін тоқтатқан емес. Ал соңғы жылдары технологиялық серпін қарқын ала түсті.
2015 жылы облыс әкімдігінің қолдауымен «Даму» қоры арқылы «Өндіріс – 2» бағдарламасы бойынша 171 млн. теңге көлемінде жеңілдікті несиеге қол жеткізілді. Алынған қарыз толық әрі уақытылы қайтарылды. Бөлінген қаражатқа озық жабдықтар сатып алынып, орнатылды. Арнайы зертхана құрылды. Жергілікті шаруашылықтардан тәулігіне 15 тоннаға дейін шикізат алынып, үш деңгейлі сүзгілеуден өтеді.
Зауыт өнімдері тек Текелі қаласында ғана емес, облыстың басқа да елді мекендерінде сұранысқа ие. Консервантсыз экологиялық таза тауарлар Текелі дүкендерімен бірге Талдықорған, Алматы қалаларындағы сауда нүктелеріне жеткізіледі. Кәсіпорын жетекшісі Владимир Стрельцовтың айтуынша, өнім өндіруге ерекше көңіл бөлінеді. Осы тұрғыда өнімдердің табиғи дәмін, құндылығын, балғындығын сақтау аса маңызды. Танымалдылықтарының басты құпиясы да осында. Қазір көбіне жұмысқа жастар тартылып жатыр.
1990 жылы шебер болып келген өндіріс жетекшісі Валентина Курбактың бүгінде 30 жылдық тәжірибесі бар маман. Ол жастарға бар білгенін үйретіп келеді. Кәсіпорында қызмет атқарып келе жатқанына 13 жыл болған шебер-технолог Роза Жабықбаеваның басты міндеті шикі сүт сапасын тексеріп, оны цехтарға жіберу және ол өзінің осындай жауапты істі міндетіне алғанына қуанышты.
Өндіріс орнының жетекшісі Жалдыбай Әлиев, Светлана Данилова, Наталья Багунова, Татьяна Симакова секілді еңбеккерлермен мақтанады. Кәсіпорында, сондай-ақ, 2000 жылы Ресейден Қазақ-станға көшіп келген Сағынтай Ғалимов дайындаушы-жүргізуші қызметін атқарады. Жұмысы таңғы сағат 3.30-дан басталады. Сағат 6.00-де таза сүтке толы машинасы таңғы асқа үлгеру үшін мектептерге, балабақшаларға және ауруханаларға жол тартады. Мұндай маңызды жеткізілімдерді қойма меңгерушісі Марьяш Ғалимова үйлестіреді.
– Біз тапсырыс бойынша жұмыс істейміз. Өйткені біздің өнім тек табиғи ингредиенттерден тұрады және балалар үшін өте пайдалы, – дейді ол.
Текелі қаласындағы сүт зауыты – Жетісу өңіріндегі азық-түлік өндірісінің маңызды кәсіпорындарының бірі. Табиғи құрамы мен жоғары сапасының арқасында тұтынушылардың сеніміне ие болған өнімдер өңір тұрғындарының күнделікті азық-түлік қоржынынан орын алған. Зауыт тұрғындарды сапалы сүт өнімдерімен қамтамасыз етіп қана қоймай, аймақтың әлеуметтік-экономикалық дамуына да елеулі үлес қосып келеді.
Айгүл БАЙБОСЫН
Текелі қаласы
