Елімізде құлпынай маусымы қыза түсті. Жазғы жидек саудасы басталысымен өңірлердегі баға айырмашылығы да байқалып отыр. Әйтсе де, Талдықорғандағы құлпынай бағасы бірқатар қаламен салыстырғанда қолжетімді, – деп хабарлайды 7-su.kz ақпараттық порталы.
Талдықорған базарында құлпынайдың келісі шамамен 1 600 – 1 800 теңге аралығында сатылуда. Бұл баға еліміздің оңтүстік өңірлеріндегі көрсеткіштерге жақын. Мәселен, Қызылордада құлпынай 1 100 – 1 800 теңге болса, Түркістан мен Шымкентте 1 200 теңгеден басталады.
Ал елорда мен солтүстік аймақтарда баға айтарлықтай жоғары. Астанада жидек бағасы 2 000 – 3 200 теңгеге дейін жетсе, Көкшетауда 2 400 – 2 700 теңге аралығында. Петропавл мен Өскеменде де құлпынайдың келісі 2 000 теңгеден асады.
Батыс өңірлерде баға тіпті қымбат. Атырауда құлпынайдың келісі 4 500 теңгеге дейін көтерілген. Ақтөбе мен Ақтауда да баға 3 000 теңгеден жоғары.
Саудагерлердің айтуынша, Талдықорғандағы бағаның салыстырмалы түрде төмен болуына өңірге өнімнің жақын аймақтардан жеткізілуі әсер етеді. Сонымен қатар Жетісу облысында бақша өнімдеріне сұраныс жоғары болғанымен, тасымал шығыны батыс пен солтүстік өңірлерге қарағанда аз.
Мамандар құлпынай бағасы маусым ортасына қарай тағы да арзандауы мүмкін екенін айтады. Себебі алдағы уақытта жергілікті өнім көлемі көбейіп, нарықтағы ұсыныс артады.
