Облыстық ветеринария басқармасы Талдықорған қалалық ветеринариялық стансысына қарасты Еркін ауылдық округі бойынша ветеринарлық пункт ашылды.
Заман талабына сай бой көтерген нысанның ашылу салтанатына ветеринария саласының мамандары мен ауыл тұрғындары қатысты. Игі шарада ветеринарлық пункттің лентасы қиылып, жиналған қонақтар жаңа ғимаратты көрді. Ауыл ақсақалдары сөз сөйлеп, жылы лебіздерін жеткізді. Сала ардагері Айдарбек Әбілқасымұлы ақ батасын беріп, ізгі тілегін арнады.
Еркін ауылдық округі бойынша ветеринарлық пункт меңгерушісі Жанұзақ Қанағатовтың айтуынша, нысанның құрылыс жұмыстары өткен жылдың желтоқсан айында аяқталған. Бұған дейін мамандар қаланың әр жерінде жұмыс істеген. Ендігі кезекте олар жаңа нысанда отырып, Еркін ауылдық округі бойынша шаруа қожалықтары мен тұрғындардың төрт түлігіне қызмет көрсететін болады.
Жетісу облыстық ветеринария басқармасының басшысы Нұрлан Жамаубаевтың сөзінше, бүгінде облыс әкімі бұл салаға ерекше көңіл бөліп отыр. Мәселен, әкімнің қолдауымен аймақ бойынша ветеринарлық пункт салуға 397 миллион теңге бөлінген. Ветеринарлық жұмыс атқаратын қажетті техникалармен де қамтамасыз етілуде. Мәселен, былтыр 25, ал биыл 17 автокөлік берілген. Облыста барлығы 23 ветеринарлық пункт, 1 ветеринарлық стансы салынған. Қазіргі таңда әр ауданда 2-ден ветеринарлық пункт бой көтеруде.
Жалпы алдыңғы, былтырғы және биылғы жылдарды қосқанда, барлығы 53 ветеринарлық пункт тұрғызылып, пайдалануға берілген. Сондай-ақ, мұндай нысандар алыс елді мекендерде де бой көтеруде. Бұл жерде ветеринардан анықтама алу, мал тіркеу сияқты ветеринарлық іс-шаралар жүргізіледі. Мұндай қызметтерді атқаратын 4 мал дәрігері бар. Сала қызметкерлерінің сөзінше, алдағы уақытта ғимарат маңынан мал сою пунктін салу көзделіп отыр.
Айгүл БАЙБОСЫНОВА
